SAMARAHAN, 30 Jun — Perintah Sarawak terus ngenegapka infrastruktur bekal ai nengeri tu nengah pengawa bejalaika Projek Tangki Tikas Tinggi Samarindah ti disadang meri penguntung ngagai lebih 20,000 iku peranak di kandang menua Samarindah, lalu enggau nya ulih nambahka pengandal sistem bekal ai ba kandang endur nya.
Pengerami nasih tanah Palan Ngaga Tangki Tikas Tinggi Samarindah udah dipenyadika Menteri Perengka Guna enggau Telekomunikasyen Sarawak, Dato Sri Haji Julaihi Haji Narawi, ditu sehari tu tadi.
Dalam jaku dipansutka Kaban Kunsil Nengeri (ADUN) Stakan Datuk Hamzah Brahim meri besai terima kasih ngagai Opis Menteri Perengka Guna enggau Telekomunikasyen (MUT) Sarawak laban terus bebendar ngemujurka projek nya ti dikumbai chara strategik mutarka isu bekal ai ke udah lama ditapi peranak Samarindah.
Ku iya, Samarindah nyadi siti ari kandang endur berumah ke pemadu besai di Bagi Menua Samarahan enggau lebih 5,000 buah rumah enggau anggar penyampau tubuh lebih 20,000 iku, lalu enggau nya begunaka sistem bekal ai ke lebih efisyen, entap sereta tegap.
Nitih ku iya, peranak ukai semina betapi enggau isu pejalai ai ke baruh, tang mega ngasaika bekal ai tejanggal maya ampuh bah, lalu enggau nya ngeruga pengidup ninting hari komuniti.
“Ai endang utai ke diguna dalam pengidup. Lebuh bekal ai tejanggal tauka peneras ai baruh, nya ukai semina ngenusahka peranak bejalaika pengawa sida ninting hari, tang mega ngeruga operasyen perengka guna ke beguna baka Klinik, sekula enggau premis dagang,” ku iya.
Iya andal amat pengawa ngaga Tangki Tikas Tinggi Samarindah deka nyadi chara mutarka timpuh panjai dalam nambahka pejalai enggau penegap bekal ai, lalu enggau nya ulih nangkup guna penyampau tubuh ti majak nambah ba kandang menua nya.
Datuk Hamzah mega ngenataika pengaga ati iya ngagai semua opis menteri, opis enggau ejensi ti bisi kaul ngemujurka projek nya lalu ngarapka pengawa bejalaika iya ulih ditembuka nitihka timpuh enggau spesifikasyen ti udah ditetapka.
Berebak enggau nya, iya nyemetak madahka sukut kualiti bejalaika projek meseti seruran dikemerat lalu atur ke terit patut dipejalai ngagai sebarang kunteriktor ke enda nitihka standard enggau tanggungpengawa ke udah ditetapka, nyengkaum ngetuka kunterik enti bisi pematut.
Iya mega meri besai terima kasih ngagai Dato Sri Julaihi ti udah nyadi ketuai enggau komitmen dalam nentuka pemun rayat kelebih agi pengawa nyendiaka bekal ai beresi, arus penyambung internet enggau karan ti bekualiti meruan sereta terus nyadi batang agenda pemansang Sarawak.
Pengawa bejalaika Projek Tangki Tikas Tinggi Samarindah dikearap ulih nyadi penyungkak ngagai sistem ngagihka bekal ai ti lebih efisyen, lalu enggau nya ulih ngangkatka pengelantang enggau kualiti pengidup komuniti di kandang menua Samarindah enggau kandang endur ngelingi nya.
Sama bisi datai Sapit Menteri Perengka Guna enggau Telekomunikasyen Sarawak, Datuk Liwan Lagang, Sekretari Mendam Opis Menteri Perengka Guna enggau Telekomunikasyen Sarawak, Datu Jafri Bin Lias, Ketuai-ketuai Opis, Ketuai Raban Bansa enggau Ketuai Komuniti. — RBI
#Beritalban | Ruai Berita Iban
Rinduka | Titihka | Kunsika
