MIRI, 30 Jun – Ekspo Pelajar ti ngempuruka palan pelajar tinggi, kolej enggau ejensi latih pengelandik deka nyadi batang isi Karnival Nembiak Selangau 2026 dalam pengawa ngerembaika akses ngagai pelajar, ngenegapka pengelandik teknikal sereta ngasilka raban nembiak nyikap diri betapi enggau penguji ekonomi digital.
Program ke diatur Serakup Intelektual Bansa Asal Sarawak (PERANTIS) enggau kerejasama Palan Latih Teknologi Lanjutan (ADTEC) Bintulu, Sekula Pengelandik Yahos enggau Palan Servis DUN N.59 Tamin deka diatur ba Dewan Serbaguna Selangau kena 25 Julai 2022 tu ila.
Sekretari Komunikasyen Media ungkup Karnival Nembiak Bansa Asal 2026, Jacqueline Martin, madahka ekspo pelajar nya meri peluang ngagai graduet Sijil Pelajaran Malaysia (SPM) enggau Sijil Sekolah Tinggi Malaysia (STPM) ngulihka penerang pasal jalai belajar ke lebih jauh, setipikit enggau peluang pengelandik sida, minat enggau potensial diri empu.
Nitih ku iya, karnival tu mega ngemeratka pengawa ngemansangka pengelandik digital enggau teknikal nyadika penyikap ngagai raban nembiak napi ubah rampa kereja ti majak diiri enggau teknologi, inovasyen enggau Revolusi Industri 4.0.
“Genap iku orang biak enda ngira penatai, meseti diberi awak ke sama ngerembaika potensial sida nengah pelajar enggau latih pengelandik laban kedua-dua nya nyadi pelasar penumbuh modal mensia ke bekualiti,” ku iya.
Kelimpah ari ekspo pelajar, karnival tu mega bisi nyendiaka Kus Ngaga Produk Manuk Rangkai ti dipelanja penuh Program Karnival Nembiak Selangau dikena mantaika penyereta peluang dagang dalam industri memproses pemakai.
Kus sehari nya berengkah pukul 9.00 pagi nyentuk 4.30 lemai deka ngembing penyereta ngasilka empat bengkah produk iya nya Nugget Manuk, Manuk Tempura, Chicken Fingger enggau Manuk Popcorn.
Pengawa ngambi bagi enda bebayar, seraya semua produk ke diasilka sepemanjai kus tu ulih dibai pulai penyereta pengudah latih tembu.
Penyereta dipinta ngerejista diri sebedau pukul 8.30 pagi lalu nitihka kus nya enggau penuh nyentuk ke tembu pukul 4.30 lemai, kelimpah ari enti bisi pemendar ari sekretariat.
Dikena matak pengerindu raban nembiak ba teknologi enggau industri kreatif digital, karnival nya mega bisi ngatur Pekit e-Lumba enggau Main PUBG ti diatur Sekula Pengelandik Yahos.
Pekit tu nyendiaka perais sepenyampau RM1,800, ke alai Champian mai pulai perais mata duit RM800, Lumur Dua RM400, Lumur Tiga RM200 enggau empat perais sagu ati berega RM100 siku.
Pengawa ngambi bagi enda bebayar ungkup raban nembiak ke beumur 16 taun ke atas dalam tim ke bisi empat ngagai lima iku pemain.
Tetiap penyereta semina dikemendarka ngarika siti tim lalu enda tau enda mai telefon pintar kediri empu, seraya perengkaguna internet pekit tu deka disediaka pengatur.
Ku Jacqueline, gempung ekspo pelajar, kus pengelandik enggau pekit e-lumba nyadika Karnival Nembiak Selangau 2026 nyadi pelasar pemansang nembiak ke komprehensif enggau ngemeratka pekara pelajar, pengawa dagang, pengelandik teknikal enggau nguasa teknologi digital.
Iya ngarapka mayuh agi raban nembiak ari serata Sarawak ngerebut peluang nyereta program nya dikena nambahka penemu, ngulihka pengelandik baru sereta mansik peluang pelajar enggau kereja ke bisi disediaka. – RBI
#ruaiberitaiban#newsiban#beritaiban
Rindu | Titih | Kunsika
