KUCHING, 15 Jun – Angkatan Zaman Mansang (AZAM) Sarawak bebendar deka ngadaka mayuh agi raban nembiak ti bepenau, besemekih sereta ulih nyadi ejen ubah ti mai empas positif ngagai komuniti enggau pemansang nengeri.
Ketuai Pemesai Eksekutif AZAM Sarawak, Ali Suhaili madah, pemansang raban nembiak kemaya hari tu patut ngelui ari semina nyereta program aja, tang ngemeratka pengawa ngemansangka individu ti bepenau meri embing ngagai komuniti nengah pengawa nyadi ketuai, penemu enggau pengawa ti positif.
Nitih ku iya, AZAM meda raban nembiak nyadi aset strategik ti bisi potensial nyadi ketuai komuniti, ejen ubah enggau pengerembai pemansang komuniti, kelimpah ari bejalaika tanggungpengawa nyadi malin dalam konteks ke lebih luas.
“AZAM deka meda mayuh agi raban nembiak Sarawak nyadi individu ti ulih meri embing ngagai mensia mayuh nengah nilai, integriti, nyadi ketuai enggau pengawa ti positif.
“Pengawa ngembing bepelasarka penau ti deka diasilka kami ukai semina sida ti ngembuan raban ti mayuh, tang sida ti ulih meri inspirasyen, nempa peluang sereta mai ubah ti bisi reti ngagai komuniti.
“Nengah pelasar baka AZAM Young Souls (AYS), kami nyendiaka ruang ngagai raban nembiak nempa pengarap diri, ngenegapka pengelandik nyadi ketuai enggau komunikasyen sereta ngerembaika potensial sida nyadi ketuai jemah ila ke ulih meri pangka ngagai pemansang Sarawak,” ku iya lebuh bejaku ba Pengerami Nutup Program AYS Capacity Building 2026 di Kompleks AZAM seharitu tadi.
Iya mega nyemetak madahka AYS begunaka terus mansang nyadi pelasar pemansang nembiak ke relevan enggau guna ke diatu, kelimpah ari nyadi ruang endur nembiak rebak baru nempa kaul, mansik peluang baru sereta ngerembaika potensial sida.
Program AYS Capacity Building 2026 ti diatur ari 12 ngagai 15 Jun tu tadi ngempuruka 51 iku penyereta ti mungkur kaban AYS enggau Toastmasters AYS.
Berambai jaku “Leading the Legacy: Lead Today, Inspire Tomorrow”, program nya diatur nyadi sebagi ari pengawa AZAM ti seruran dipejalaika dikena ngenegapka raban nembiak nengah pemansang nyadi ketuai, komunikasyen, pengawa volunteer enggau ngaul komuniti.
Program tu mega beguna nyadi pelasar pemansang dikena ngiring sereta ngenegapka pangku pengawa Komiti AYS baru ungkup penggal 2026 ngagai 2028 dalam ngiring mayuh macham inisiatif nembiak jemah ila.
Sepemanjai pengawa empat hari nya, bala penyereta dipeda enggau mayuh macham aktiviti pemansang diri enggau nyadi ketuai bepelasarka chara belajar peneleba, ti ngemeratka pengawa nempa ulah, berunding kritikal, pengelandik komunikasyen, kereja beraban enggau penyedar rama.
Pengawa ngatur program tu mandangka komitmen AZAM ti seruran ngemansangka modal mensia nembiak ti ukai semina ngembuan pengelandik enggau penemu, tang mega bepenau nyadi ketuai enggau ejen ubah ti ulih nyaup pemansang komuniti, nengeri enggau menua.
Seriris enggau rambai jaku program, bala penyereta mega dikingatka tetiap pengawa ke dipejalaika sehari tu bisi potensial nyadi inspirasyen enggau legasi ke deka ditampung rebak dudi hari. – RBI
#ruaiberitaiban#newsiban#beritaiban
Rindu | Titih | Kunsika
