PAKAN, 14 Jun – Program Pakan Agrofest 2026 taja diatur dua hari mujur matak 3,640 iku temuai enggau penyampau asil jual manggai RM58,492.25 naka pukul 9 pagi, lalu enggau nya ngayanka timbal komuniti ti meransang ba pemansang sektor betanam betupi enggau agro di kandang menua tu.
Direktor Betanam Betupi Sarawak, Dominic anak Chunggat madah, Pelilih Pakan nyadi palan kedua dalam siri Roadshow Agrofest Renggat Bagi Menua ke diatur Opis Betanam Betupi Sarawak.
Nitih ku iya, pekara ti pemadu dikerinduka renggat tu iya nya Sarawak Agrofest 2026 ti diperambu deka diatur ba Padang Bilun Lama Bintulu berengkah 25 September nyentuk 4 Oktober 2026.
Iya mansutkan jaku tu ba Program Nangguhkan Pakan Agrofest 2026 ba Laman Pakan, seharitu tadi.
Ku iya nerang, Pakan Agrofest 2026 ngembuan juluk deka meri kelala bemacham program pemansang ke bisi disediaka ejensi enggau opis ke bekaul, kelimpah ari ngelakuka produk betanam betupi, berikan enggau produk hiliran menua tu.
“Program tu mega meri penerang ngagai pekebun pasal penemu enggau teknologi baru nengah kus, demonstrasyen enggau pemindah teknologi, kelimpah matak pengerindu raban nembiak ngemeranka pengawa betanam betupi,” ku iya.
Sepenyampau 38 bansal dibuka sepemanjai program nya nyengkaum 15 bansal pemandang, 13 bansal bejual enggau 10 bansal khas ari baruh Dapur Pakan ti nyendiaka ruang ngagai orang dagang menua tu ngelakuka produk sida.
Nitih ku Dominic, pengawa muka bansal nya ukai semina meri mayuh macham servis ngagai temuai, tang mega mandangka teknologi enggau inovasyen pemadu baru dalam sektor betanam betupi seriris enggau rambai jaku Agrofest taun tu, iya nya “Ngemeranka Inovasyen Betanam Betupi Ke Pengelikun Pemakai.”
Iya minta mensia mayuh nguna peluang ke bisi disedia nengah chara ngelawa tetiap bansal, nyukung produk orang dagang menua tu sereta ngulihka penemu bekaul enggau teknologi betanam betupi sereta inovasyen ke bisi dipandangka.
“Penatai enggau sukung komuniti beguna amat dalam mantu nyungkak ekonomi komuniti sereta ngenegapka sektor betanam betupi menua tu,” ku iya.
Sepemanjai program nya, tujuh bengkah sesi meri penerang udah diatur ti ngaul mayuh bengkah ejensi enggau institusyen ke bekaul, nyengkaum Penerang Pemansang Betanam Betupi Bagi Menua Sarikei, Penerang Besai Tanah Adat Bumiputera NCR, Pensijilan MSPO Minyak Sawit Lestari Malaysia, Empas ari penyakit Rabies, Agro Betanam Betupi Nengah “Perbankan”, Pengawa Ngatur Tanam Nanas sereta Program Pemansang Getah enggau Bantu Getah.
Kelimpah ari nya, bemacham demonstrasyen mega bisi diatur nyengkaum ngasilka tinduh, nanam ikan ai tabar, ngasilka filamen lia enggau teknologi ngawin buah, ti narit ati bala temuai.
Dominic meri besai terima kasih ngagai semua pemeri penerang enggau demonstrator ti bekunsika penemu, peneleba, enggau pengelandik sida enggau komuniti.
Iya andal semua isi ti disediaka sepemanjai Pakan Agrofest 2026 deka meri penguntung ke besai ngagai komuniti bumai, kelebih agi ari sukut pemindah teknologi, bekunsika penemu baru, sereta nambahka penemu bekaul enggau chara betanam betupi moden.
“Program baka tu besai dikena nentuka komuniti betanam betupi seruran betemu enggau teknologi pemadu baru sereta ulih nambahka produktiviti enggau daya besemekih sektor betanam betupi di Sarawak,” ku iya.
Sama bisi datai iya nya Tan Sri William Mawan anak Ikom, Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) ke mega ADUN Pakan, Datuk Larry Soon @ Larry Sng Wei Shien, Chairman Industri Kayu Ramu Malaysia ke mega Kaban Parlimen Julau, Sekretari Tetap Opis Menteri Industri Pemakai, Komoditi enggau Pemansang Kandang Menua, Datu Sirai anak Daha, Pemesai Pelilih Menua Pakan, Mohd Irwan bin Abdullah @ William Manggoi, Pemesai Opis Betanam Betupi Bagi Menua Sarikei, Jessyca anak Andrew Mujah, pengari ejensi perintah sereta selampur peranak Pakan. – RBI
#ruaiberitaiban#newsiban#beritaiban
Rindu | Titih | Kunsika
