PAKAN, 13 Jun – Peranak Rumah Panjai James ak Asang di Ulu Pedanum, udah nerima penerang aspek pengelikun ari penusah angus nengah Program Penyedar Mensia Mayuh ke diatur Balai Bomba enggau Penyah Penusah (BBP) Bintangor kemari.
Ketuai BBP Bintangor, PPgB Mahmudin Naruddin, madahka program nya ngembuan tuju nambahka penyedar mensia mayuh senentang atur nyeliah penusah angus enggau pengawa tumu ti patut diambi lebuh betapi enggau penusah ngenyit.
Program ti mungkur 43 pintu rumah panjai nya udah dipejalaika Ketuai Stesyen begulai enggau PBK I Mijan Pamin enggau PBK II Herman ak Basa.
Entara batang isi program tu iya nya meri penerang pandak bekaul enggau pengelikun ari penusah angus ba premis genturung pendiau, meri kelala pasal perengka pengerara api enggau prosedur ke betul ngena perengka nya.
Bala penyereta mega diberi penerang bekaul enggau chara nagang penusah angus ti ngaul dapur nyumai, ke nyadi entara batang kebuah penusah angus nyadi ba rumah.
Kelimpah ari nya, sesi demonstrasyen ngerara api ngena perengka pengerara api mega bisi diatur dikena meri peneleba praktikal ngagai peranak dalam mutarka gaya penusah ngenyit enggau likun sereta ngasi.
Kenu ku Mahmudin, program baka tu beguna dalam nempa komuniti ti lebih nemu sukut pengelikun sereta ulih bejalaika pengawa enggau lengkas sebedau penatai raban bomba nyema bisi penusah angus nyadi.
Iya ngarapka penemu enggau pengelandik ke dikunsi ulih dikena peranak ngurangka risiko penusah angus sereta nyaga nyawa enggau reta tengkira komuniti menua nya. – RBI
#ruaiberitaiban#newsiban#beritaiban
Rindu | Titih | Kunsika
