MERADONG, 13 Jun – Siku lelaki peranak menua tu beumur 26 taun ditan Raban Petugas Indu Opis Polis Pelilih (IPD) Meradong dalam operasyen Ops Tapis ti dipejalaika ba kandang menua Bintangor pagi tadi.
Kepala Polis Pelilih Meradong, DSP Tansli Mering madah, saspek ditan urung pukul 9.30 pagi pengudah dipelaba bisi kaul enggau aktiviti salah guna dadah.
Nitihku iya, suspek udah nya dibai ngagai IPD Meradong ngambika atur silik agi dipejalaika sebedau beperesa tisih ai kemi ba Opis Bagian Tasat Jenayah Narkotik (BSJND) Pelilih Meradong.
“Asil peresa tetemuka saspek positif amphetamine enggau methamphetamine,” ku iya nengah penerang berita sehari tu tadi.
Iya mega madah, pengawa meresa rikod ke udah tetemuka saspek bisi rikod penyalah bekaul enggau dadah.
Kes tu diatu benung dipansik ari baruh Seksyen 15(1)(a) Akta Dadah Berbahaya 1952, ti nyendiaka ukum mata duit enda ngelui ari RM5,000 tauka jil nyentuk dua taun, nyema dikenuku salah.
DSP Tansli nyemetak madahka polis beratika penyalah bekaul enggau dadah enggau berat lalu enda belembut ba sebarang aktiviti ti tau ngeruga pengelikun enggau pengelantang komuniti.
“Polis deka terus chakah agi bejalaika operasyen enggau pengawa neritka atur dikena ngelaban pengawa salah guna dadah di pelilih tu.Kerejasama komuniti beguna amat dalam pengawa ngelaban penusah dadah tu,” ku iya.
Berindik enggau nya, mensia mayuh ke bisi penerang bekaul enggau aktiviti nyadung tauka salah guna dadah di pelilih Meradong dipinta ngenataika penerang nya ngagai polis nengah lumur Balai Polis Bintangor ba lumur 084-693222.
Iya mega ngingatka pengawa ngelaban dadah begunaka komitmen ti seruran ari semua piak dikena nentuka pelilih menua Meradong seruran likun sereta lepas ari keruga salah guna dadah. – RBI
#ruaiberitaiban#newsiban#beritaiban
Rindu | Titih | Kunsika
