SELANGAU, 12 Jun – Perintah terus ngayanka komitmen dalam ngenegapka agenda pelajar menua pesisir lebuh pengawa ngaga baru Opis Pelajar Pelilih Menua (PPD) Selangau ke beungkus RM35 juta deka nyadi pengepun ngemanahka agi sistem meri pelajar di pelilih tu.
Ku Kaban Kunsil Nengeri (ADUN) sitak Tamin, Ir. Christopher Gira Sambang, pengawa beranakka puku ke besai dalam sektor pelajar nyata ngayanka penegap perintah nentuka tetiap nembiak di Selangau bisi akses ngagai perengka guna pelajar ke lebih bekualiti, moden sereta kondusif.
Iya madah munyi nya lebuh bejadika Pengerami Nasih Tanah Taba ungkup pengawa ngaga PPD Selangau ti nyadi sehari tu.
Dalam jaku dipansutka iya, Gira nyemetak madahka pelajar nyadi batang pelasar pemansang sesebengkah raban bansa sereta patut diberi perati ti seruran dikena ngadaka rebak ti bepenemu, bepengelandik sereta ulih meransang penyulut nengeri enggau menua.
“Pengawa ngaga PPD baru Selangau ukai semina nyendiaka begunan pentadbiran aja, tang nyadi puku strategik dikena ngenegapka pengawa ngatur pelajar, ngangkatka pemanah pengawa meri servis sereta nyukung pemanah sekula ari baruh pentadbiran pelilih menua,” ku iya.
Nitih ku iya, begunan baru ke disikap enggau perengka guna pentadbiran moden deka mantu ngangkatka koordinasyen enggau aktiviti ngatur pelajar, lalu enggau nya meri penguntung terus ngagai raban pengajar enggau nembiak di serata pelilih menua Selangau.
Gira mega nyemetak madahka pemansang pelajar di Selangau ukai semina ngaga PPD aja, tang perintah benung bejalaika projek ngaga baru ungkup Sekula Sekondari (SMK) Selangau ke beungkus RM81 juta kelimpah bemacham projek ngaga baru enggau ngangkatmanah sekula repuk di menua pesisir.
“Lebuh perengka guna pelajar dikemanah, kitai ukai semina nyendiaka palan belajar ke manah agi, tang mega ngadaka modal mensia ke bekualiti ke ulih nyaup pemansang Selangau, Sarawak enggau menua tu jemah ila,” ku iya.
Iya mega madahka sekeda projek pelajar bukai benung sereta deka dipejalaika nyengkaum ngaga ganti baru buding nembiak lelaki enggau dewan makai kelimpah ari kereja ngangkatmanah sistem bekal ai berubat di SMK Ulu Balingian.
Kelimpah ari nya, perintah mega beratika pengawa ngaga baru sereta ngangkatmanah sekula ti begunaka perengka guna ke manah agi baka SK Sungai Sepiring, SK Batu 36, SK Dijih enggau SK Penghulu Imban.
Iya ngarapka semua projek ti udah diperambu ulih dipejalaika nitihka timpuh ngambika penguntung nya ulih diasaika komuniti menua nya sereta nyadi pematak ngagai penyulut pelajar enggau pemansang sosio-ekonomi di kandang menua Selangau selampur.
Sama bisi datai Pemesai Pelilih Selangau, Yalin Assan ngarika Residen Bagi Menua Sibu enggau Sapit Pemesai Pelajar Pelilih Selangau, Joanes Tulang. – RBI
#ruaiberitaiban#newsiban#beritaiban
Rindu | Titih | Kunsika
