SONG, 10 Jun — Mensia mayuh kelebih agi penguna sungai ba kandang menua Sungai Musah, Katibas dilalau nitihka atur pengelikun sereta ngena jalai sementara ti udah disedia sepemanjai pejalai projek ngaga baru Jematan Nanga Musah.
Nitihka notis ti dipansutka Sarawak Rivers Board (SRB), kereja ngererak enggau ngaga baru jematan nya berengkah kena 22 Oktober 2025 lalu diperambu tembu kena 21 April 2027.
Berindik enggau nya, semua penguna perau ti nengah kandang endur nya dipinta nurun ari perau lalu ngena jalai bejalai kaki sementara ti udah disedia dikena nentuka pengelikun sida sepemanjai timpuh projek dipejalaika.
Perau ke nengah kandang endur nya mega dibantu pemesai ke udah dipadu nentuka pemindah ulih dipejalaika enggau likun sereta teratur.
SRB mega ngelalau semua penguna sungai enggau mensia mayuh ba sepemanjai Sungai Musah, Katibas ngambika seruran meri kerejasama sereta ngasika atur pemesai ba endur nya dikena nyeliahka sebarang penusah ke enda dikedekaka nyadi.
Lebuh dikerandau, Kaban Kunsil Nengeri (ADUN) Katibas Lidam Assan madahka sesi ngaul peranak enggau komuniti besemak udah diatur sebedau projek nya berengkah dikena meri penerang pasal chara mindah, ngena jalai sementara enggau atur pengelikun ti meseti dititihka sepemanjai timpuh ngaga.
Ku iya, kerejasama rat entara ejensi ti bejalaika pengawa, kunteriktor enggau peranak menua nya beguna amat dikena nentuka pengelanchar pejalai projek enggau pengelikun semua penguna sungai ti nengah kandang menua nya.
“Nya alai, aku minta semua peranak ke bisi kaul enggau penguna sungai di kandang menua Sungai Musah, Katibas terus meri kerejasama sereta nitihka gerah ke udah ditetapka dikena ngelancharka pengawa bejalaika projek ngaga baru jematan tu,” ku iya.
Iya mega ngenataika pengaga ati enggau terima kasih ngagai peranak menua nya ke udah besabar, mereti sereta meri kerejasama sepemanjai timpuh projek nya dipejalaika.
Berebak enggau nya, iya muji komitmen SRB, kunteriktor ti bejalaika pengawa enggau staf lapangan ti seruran mantu peranak meraka kandang endur ngaga enggau likun sereta nentuka pemindah ninting hari komuniti setempat ulih diteruska enggau nadai pengeruga ke besai.
Nitih ku iya, semua pemar ke ditapi sekumbang timpuh bejalaika projek nya semina sementara aja lalu deka meri pemaik timpuh panjai ngagai peranak menua nya nengah pengawa nyendiaka infrastruktur ke lebih likun, moden sereta bekualiti jemah ila.
Sebedau tu, bisi penerang dikunsi ba media rama bekaul enggau gaya jalai alun di Sungai Musah ti meri tanya ngagai peranak menua nya.
Taja pia, perengkaguna jalai sementara enggau bantu ari orang gawa ba palan nya udah disediaka dikena nentuka pejalai peranak enda tekeruga sekumbang bejalaika projek nya.
Mensia mayuh dilalau ngulihka penerang ari jalai rasmi sereta seruran nitihka atur piak bekuasa ungkup pengelikun pangan diri enggau pengelanchar bejalaika projek pemansang infrastruktur. — RBI
#Beritalban | Ruai Berita Iban
Rinduka | Titihka | Kunsika
