NGEMAH, 5 Jun – Kaban Kunsil Nengeri (ADUN) sitak Ngemah, Anyi Jana nyemetak madahka pelajar nyadi puku ke pemadu manah ungkup pengidup nembiak rebak baru lalu deka terus diberi perati nengah mayuh bengkah inisiatif bantu pelajar ba sitak iya.
Iya madah munyi nya lebuh bejadika Pengawa Nyuaka Insentif Pelajar ngagai nembiak nyulut Sijil Pelajaran Malaysia (SPM) 2025 ba Opis Palan Servis Parti Rakyat Sarawak (PRS) N.49 Ngemah sehari tu tadi.
Ba pengerami nya, sepenyampau 69 iku nembiak ke bulih pemutus peresa nyulut ba peresa SPM 2025 nerima insentif pelajar sepenyampau RM20,700 kelai meri terima kasih ngagai pengepuh enggau penyulut sida.
Dalam jaku dipansutka iya mega, Anyi Jana meri pengaga ati ngagai semua penerima seraya ngarapka pemujur ke dijapai nya nyadi pematak terus nempa penyulut ba tikas pelajar ke tinggi agi.
Ku iya nerang, genap iku nembiak ke bulih pemutus peresa 3A ke atas nerima insentif RM300 siku.
Kelimpah ari nya, nembiak ke nampung pelajar ngagai renggat diploma deka nerima bantu pelajar RM500 siku, lalu sida ke nampung pelajar ngagai renggat ijazah sarjana muda layak nerima bantu RM1,000 seiku.
“Kena meh peluang ke bisi dikena nyura pengidup kita jemah ila. Enti kita bisi perambu deka nampung pelajar ngagai tikas ke tinggi agi, pilih meh bidang ke amat dikerinduka kita sereta ngembuan peminta ke manah ba makit kereja,” ku iya.
Iya mega bisi bekunsika peneleba diri maya belajar sereta gawa nyadi pengajar sebedau diberi pengandal nyadi pengari rayat.
Kenu ku iya, pemujur ke dijapai sehari tu asil ari pengawa bebendar, disiplin enggau pengeran dalam negika juluk diri.
Ku iya, ngarapka peneleba nya ulih meri inspirasyen ngagai nembiak rebak baru ngambika terus bebendar ngulihka pemujur dalam akademik enggau kereja jemah ila.
Sama bisi datai bini ADUN Ngemah, Puan Gelim Utan, Pemesai Unit Penyambung Mensia Mayuh Sarawak (UKAS) Bagi Menua Sibu, Jelani Ajang, Chairman Tetap Parti Rakyat Sarawak (PRS), Jetli Jelian Pemancha Charlie enggau Pemancha Iban Kanowit, Pengulu Pree Minggat, Pengulu Tiong Ming Kiong, Pengulu Kong Chak Pee sereta mega bala penerima insentif begulai enggau diri sebilik sida empu.
Program tu mandangka komitmen Anyi Jana ti seruran ngenegapka pelajar sereta meri kelala ngagai nembiak ti mai pemaik ngagai nama ruang bilik enggau sitak DUN Ngemah nengah pemujur akademik sida ti chukup ngemegahka ati. – RBI
