KUCHING, 26 Mei — Sapit Premier Sarawak, Datuk Amar Douglas Uggah Embas muji penyulut enggau pemansang positif Opis Kereja Raya (JKR) Sarawak ti dikumbai iya majak tampak ba pengawa meransang pemansang infrastruktur nengeri tu.
Ku iya, komitmen enggau dedikasyen semua staf JKR Sarawak udah bejalaika tanggungpengawa ti beguna dalam nentuka pengelanchar bejalaika bemacham projek infrastruktur ungkup pengelantang rayat enggau penyulut terus Sarawak.
Nitihku iya, pengulih JKR Sarawak bejalaika projek besai sereta meri empas tinggi nyata ngayanka pengulih opis nya terus besemekih setipak enggau aspirasyen pemansang nengeri.
Iya madah munyi nya lebuh ngulu Pengerami Mantar Gawai Dayak JKR Sarawak 2026 ti diatur begulai enggau staf opis nya ditu, sehari tu tadi.
Berebak enggau nya, Direktor JKR Sarawak, Datu Dr. Cassidy anak Morris madahka staf JKR Sarawak amat temegah ati enggau pemujur pengawa bejadika Jematan Batang Lupar No.1 kena 21 Mei tu tadi.
Nitihku iya, jematan nya ke meraka sungai ke pemadu panjai di Malaysia lalu nyadi kelai pengulih JKR Sarawak ngamatka infrastruktur tikas dunya ungkup rayat setipak enggau rambai jaku “We Build World Class Infrastructure For You.”
Iya mega ngemeratka komitmen JKR Sarawak terus nengah rambai jaku “JKR Sarawak, Jalan Kita Rapi, Jaga Kemudahan Rakyat, Just Keep Rising!”
Pengerami nya mega dirichah enggau bemacham main asal enggau pemerindang nyengkaum pemerindang ari Yayasan Kebudayaan Dayak, ASADIA enggau Little Bornean Birdie ti mujur ngerichahka agi pengerami Gawai Dayak taun tu. – RBI
