ISTANBUL, 24 Mei – Pengawa ngelancharka Littoral Mission Ship Batch 2 (LMSB2) keterubah Soldadu Tasik Diraja Malaysia (LMSB2), Tunku Laksamana Abdul Jalil, nyadi siti agi pemujur ke beguna ngagai menua tu dalam pengawa ngenegapka penau pertahanan maritim ke moden sereta kompetitif.
Nitihka penerang rasmi ari Soldadu Tasik Diraja Malaysia (TLDM), pengerami meri nama enggau ngelancharka kapal nya diatur ba Palan Kapal Istanbul, Türkiye lalu dipenyadika Kebawah Duli Yang Maha Mulia Seri Paduka Baginda Raja Permaisuri Agong Raja Zarith Sofiah.
Pengerami nya mega digulu Menteri Pengelikun Menua, YB Dato’ Seri Mohamed Khaled bin Nordin, Sapit Sekretari Besai (Pemansang) Opis Menteri Pengelikun Dato’ Abdul Hadi Omar enggau Panglima Armada Barat Laksamana Madya Dato’ Baharudin bin Wan Md Nor.
Nitihka penerang nya, pengawa meri nama kapal LMSB2 keterubah iya nya Tunku Laksamana Abdul Jalil nyadi kelai basa ngagai niang anakanda keempat Kebawah Duli Yang Maha Mulia Seri Paduka Baginda Yang di-Pertuan Agong Sultan Ibrahim enggau Raja Permaisuri Agong Raja Zarith Sofiah ke mega kerabat Diraja Johor ti keterubah nerima gelar “Laksamana” dalam sejarah moden.
“Nama tu dipilih dikena ngemeranka pemerani, pengeliat ati enggau pengering semengat ngelaban niang nyengkaum nengah rambai jaku ‘Fight Like Jalil’ sereta mega legasi pengasih iya nengah Yayasan Kanser Tunku Laksamana Johor,” ku penerang nya.
Ba penerang nya TLDM mega nerangka pengawa milih nama nya besai amat reti laban leka jaku “Laksamana” melambangka Panglima tertinggi ti diberi tanggungpengawa ngetanka kedaulatan maritim menua sereta nyadi pun inspirasyen ngagai semua raban soldadu tasik.
Kapal Kelas Tunku ke digaga bepelasarka langkar korvet Kelas ADA ari kompeni pertahanan Turki, STM Türkiye, nyadi aset perang pemadu baru TLDM ke digaga ungkup operasyen mayuh dimensi.
Nitihka penerang nya, pengawa ngelancharka nya mega nyadika penyulut ke beguna dalam projek nya laban kapal nya deka masuk renggat ‘Setting to Work’ (STW) kelimpah ari integrasyen sistem perang enggau sensor.
Pemujur tu ngayanka komitmen ti tegap ari Tim Projek LMSB2 ari baruh iring Kapten Ts. Mohammed Noorsyarizal Mohammed Noordin TLDM dalam nentuka projek tu dipejalaika bepelasarka standard enggau timpuh ke udah ditetapka,” ku penerang nya.
Berebak enggau nya, TLDM madahka pengawa ngaga LMSB2 mega mandangka pemanah kerejasama strategik entara Malaysia enggau Turki, kelebih agi ba aspek pemindah teknologi ‘pertahanan’ entara kededua menua.
“Malaysia diatu benung ngambi singkang bukai dalam ngaga pengulih ngetanka menua ti moden sereta kompetitif dikena napi rampa pengelikun maritim ti majak kompleks sereta mayuh pemar,” ku penerang nya nambah. — RBI
