SARIKEI, 22 Mei — Opis Pengintu Pengelantang Raban Bansa Bagi Menua Sarikei udah ngatur Pengerami Sejambak Kasih Hari Gawai 2026 di Balai Mensia Mayuh Bintangor ti nyadi inisiatif dikena ngerami sereta merekatka raban ke ditagit sebedau pengerami Hari Gawai taun tu.
Pengerami nya dipenyadika Kaban Kunsil Nengeri (ADUN) Meradong Yang Berhormat Datuk Ding Kuong Hiing.
Program tu ngaul 100 iku individu tepilih ke nerima pemeri enggau bantu pengelantang pendiau.
Sama bisi datai ngerichahka agi pengerami nya, Puan Hajah Norhayati binti Haji Abdul Rahman, Sapit Direktor Pengintu Pengelantang Pendiau Sarawak, enggau Cik Alice anak Sat ti ngarika Pemesai Pelilih Menua Meradong.
Ba pengerami nya, bala penerima nerima bantu ari baruh inisiatif Perintah Sarawak nyengkaum Senior Citizen Health Benefit (SCHB), Bantuan Ihsan Kematian (BIK) sereta Kad OKU.
Pengawa bejalaika bantu tu nyadi sebagi ari pengawa perintah ti seruran dipejalaika dikena ngenegapka jalai pengelikun rama enggau pengelantang rayat, kelebih agi ngagai raban ke ditagit ke patut.
Program tu mega ngembuan tuju deka ngelempungka tating belanja penerima bantu dalam nyendiaka diri ngintu pengerami Hari Gawai 2026, kelimpah ari ngenegapka semangat pengibuh enggau pengelantang komuniti lokal.
Opis Pengintu Pengelantang Pendiau Raban Bansa Bagi Menua Sarikei meri besai terima kasih ngagai semua temuai ke dikangau ke bisi datai sereta semua pengereja pengawa ke udah meri komitmen dalam ngatur pengawa tu.
Program tu sebagi ari pengawa ti seruran dipejalaika Opis Pengintu Pengelantang Pendiau Sarawak dikena ngenegapka agenda pengelantang enggau pengelantang rama di nengeri tu. — RBI
#Beritalban | Ruai Berita Iban
Rinduka | Titihka | Kunsika
