MIRI, 22 Mei – Sambut ke chukup meransang ke diterima beserimbai enggau Pekit Kepenudi Kumang Gawai Sarawak 2026 mandangka pengangkun komuniti ngagai pesaka asal sereta semengat beserakup entara pupu bansa di nengeri tu.
Nitihku Kaban Kunsil Nengeri (ADUN) Samalaju, Datuk Majang Renggi, penatai bala temuai ke chukup mayuh nyentukka sida ngemenuhka palan Bazar Gawai Dayak enggau Pesta Etnobudaya di Bandar Baru Permyjaya nyata ngayanka program ke bepelasarka budaya nya terus diterima manah komuniti.
Ku iya, gaya ti pengerami sepemanjai program nya mega mantaika penyelai budaya komuniti Dayak ti nyadi sebagi ari identiti Sarawak.
“Terima kasih mega nuju pengatur, komiti bejalaika pengawa enggau semua piak ke udah bebendar ngemujurka program tu,” ku iya nengah sebengkah penerang pengudah bejadika pekit nya kena Hari Empat tu tadi.
Berebak enggau nya, iya mega meri pengaga enggau temegah ati ngagai semua penyereta kelebih agi pemenang pekit ketegal komitmen enggau pengangkun sida.
Pekit kepenudi diatur beserimbai enggau Bazaar Gawai Dayak enggau Festival Etnokultural ke nyadi siti ari batang pengerami sebedau Gawai di Miri.
Sama bisi datai Sapit Menteri Pengerai Mensia Mayuh, Pengawa Berumah enggau Kaunsil Kandang Menua Sarawak, Datuk Dr. Penguang Manggil. – RBI
#ruaiberitaiban#newsiban#beritaiban
Rindu | Titih | Kunsika
