Pemajik, pengandal ati enggau pengerindu ke dalam ngagai budaya Iban mantaika pemanah sereta penau Vanessa Serawa Anak Suel lebuh iya dipadu nyadi champion Pekit Kumang Iban Renggat Bagi Menua Miri 2026 beserimbai enggau Pengerami Gawai Dayak Bagi Menua Miri ke udah diatur empai lama tu tadi.
Pemenang indu ke beumur 24 taun nya ukai semina meri hak ngagai iya mai pulai perais mata duit RM5,000, tang mega nerima sekulasip beungkus RM20,000 ke dipelanja Kolej Antarabansa Fajar dikena ngaku penau enggau penyulut iya.
Penuduk lumur dua ba pekit nya Sylviana Rinya Galing, 22, ari Kuala Serupai nerima perais mata duit RM3,000, lalu lumur tiga diempu Michelle Allison Omban Eddy, 20, ari Nanga Salu, Sibuti enggau perais mata duit RM2,500. Pemenang perais sagu ati nerima perais mata duit RM1,500 seiku.
Taja pan tuchum iya lantang sereta gamal iya bajik ba panggau pekit, Vanessa ngaku iya kebendar enda nyangka nama iya dipadah nyadi pemenang laban tu keterubah iya nyereta pekit pemajik gamal ngagai Ruai Berita Iban.
“Aku tekenyit amat lebuh dipadahka nyadi pemenang laban tu keterubah aku nyereta pekit baka tu.
“Aku enda kelalu tinggi ngarapka diri, tang semina deka meri pemadu manah sepemanjai pekit tu,” ku iya lebuh dirandau Ruai Berita Iban.
Diada di Miri sereta datai ari ruang bilik tulin Iban ari Mukah, Vanessa madahka diri sebilik nyadi batang tiang ti meri pengering ngagai iya sepemanjai pengawa nyendiaka diri bepekit.
Iya nerangka indai iya orang ke pemadu meri peransang enggau pengeransing lebuh iya napi pemar ngatur jam entara latih pekit enggau pelajar.
Diatu benung ngambi pelajar Diploma Pelajar Tumu Nembiak Mit ba Universiti Tebuka Malaysia, Vanessa ukai semina chakah dalam bidang akademik, tang mega ngembuan pengerindu ke dalam ba pelajar nembiak khas, kelebih agi autisme.
Inspirasyen nya datai ari peneleba diri enggau menyadi iya ke biak, ke nyadi nembiak autistik.
Nitihku iya, pengurang palan belajar khas ungkup nembiak autisme di Miri ngujungka iya bemimpi deka numbuhka palan pelajar khas jemah ila.
“Nembiak mit ke bisi autisme sama baka orang bukai, sida semina ngembuan chara proses enggau komunikasyen ke bebida.
Aku ngarapka bisi hari ila aku ulih ngemansangka palan belajar ti ulih mantu sida ngulihka pelajar sereta peluang mujur dalam pengidup,” ku iya.
Kelimpah ari nemu bejaku Melayu, English enggau Iban, Vanessa mega ngembuan setipikit Jaku Jipun N4 asil ari pengerindu iya ke dalam belajarka jaku bansa bukai.
Iya mega mai basa ngagai menua lebuh iya ngarika Malaysia di Taiwan ba pekit inovasyen ITEX 2019 lalu mujur mai pulai midul emas begulai enggau tim ari SMK Merbau.
Kenu ku Vanessa, pejalai ngulihka gelar Kumang ukai pejalai ti muntang laban iya patut ngaga penyikap enggau silik ari sukut runding, emosi enggau fizikal.
Entara pemar ke besai ditapi iya iya nya ngatur jam enggau manah nyadi nembiak seraya ngasaika latih pekit intensif.
Iya mega belajarka chara mantaika ngepan asal berat, ngemanahka agi teknik komunikasyen, ekspresyen panggau sereta ngenalamka penemu pasal adat enggau budaya Iban.
“Siku Kumang kemaya hari tu ukai semina begunaka pemajik gamal aja, tang mega ngembuan pemintar enggau budi basa ke tinggi laban dua bengkah perangai tu beguna dikena mai diri ngagai dunya luar ke mayuh agi pemar,” ku iya.
Ba Vanessa, gelar Kumang mai reti ke besai laban ngelaika pemanah, pemintar enggau tanggungpengawa dalam ngetanka pesaka asal komuniti Iban.
Iya pechaya jaku, adat enggau seni asal nyadi batang identiti bansa Dayak ti enda tau enda terus ditanka raban nembiak rebak baru ngambika sida enda ditelan pasang moden.
Ngenang pesan niang aki iya, Dunya Anak Enchana, Vanessa madahka jaku “bejalai betungkat ke adat, tinduk bepanggal ke pengingat” endang seruran nyadi rambai jaku pengidup iya enda ngira dini alai iya diau.
“Taja pan aku nembiak rebak baru jeman moden, tang aku seruran diiri ngambika enda ngelengkaka main asal diri empu.Pekit baka Pekit Kumang tu ukai semina dikemata aja, tang diteladan sereta nyadika pelasar ngenalamka budaya bansa diri empu,” ku iya nerang.
Nyadi Kumang Iban Bagi Menua Miri 2026, Vanessa ngarapka iya ulih nyadi peransang ngagai raban indu biak Dayak ngambika terus ngiga penemu, ngemanahka budi basa sereta ngena teknologi moden enggau pintar ungkup pemansang diri enggau mensia mayuh.
Iya mega minta raban nembiak rebak baru anang sesekali putus pengarap neruska mimpi laban pemuntan semina singkang sementara nuju pemujur.
“Aku ngarapka rayat Sarawak terus ngetanka main asal bansa kitai begulai ngambika enda lenyau dibai jeman,” ku iya.
Pekit Kumang Iban Bagi Menua Miri 2026 siti ari pengerami Pengerami Gawai Dayak Bagi Menua Miri ti ngembuan juluk deka mantaika pemanah budaya, elegan enggau personaliti indu Iban di Sarawak, lalu enggau nya ngenegapka agi pengawa negika pesaka budaya Dayak ungkup rebak dudi hari. — RBI
#ruaiberitaiban#newsiban#beritaiban
Rindu | Titih | Kunsika
