KUCHING, 14 Mei – Kaban Kunsil Nengeri (ADUN) sitak N.59 Tamin, Ir. Christopher Gira Sambang mantaika sukung penuh ngagai jaku Tuai Pemegai Menua (TYT) Negeri Sarawak beserimbai enggau pengawa bejadika Aum Kunsil Nengeri (DUN) Sarawak Ke-19.
Lebuh bejuraika Mosyen Terima Kasih ngagai TYT Tun Pehin Sri Dr.Haji Wan Junaidi Tuanku Jaafar ba Aum Dewan Undangan Nengeri Sarawak sehari tu, iya nerangka jaku nya komprehensif, bisi visyen sereta ngayanka kuing Sarawak ke nyata nuju taun 2030 enggau jemah ila.
Nitih ku iya, taja pan dunya diatu betapi enggau geopolitik ti enda tentu, ekonomi global ti enda tegap, rentayan bekal tejanggal enggau ubah teknologi ti jampat, Sarawak mengkang tegap sereta tan asil ari ketuai ti tegap sereta polisi pemansang timpuh panjai ti terang.
Ku iya, ari baruh iring Premier, Sarawak diatu majak dikelala nyadi pelilih menua ti ngembuan visyen ungkup ekonomi jemah ila enggau penegap politik ti tegap.
Ba jaku iya mega nyemetak madahka Strategi Pemansang Pengudah COVID-19 2030 (PCDS 2030) ukai semina dokumen polisi aja, tang nyadi pelin besai dikena ngubah Sarawak nyadi pelilih menua ke maju, meruan sereta bepenatai pemisi tinggi.
Ku iya, Sarawak diatu benung nyingkang ari ekonomi bepelasarka penatai ngagai ekonomi nguna teknologi enggau penemu nengah pemansang ekonomi digital, pemintar tiru (AI), aeroangkasa, kuasa hidrogen, kuasa tau dikena baru enggau pemansang modal mensia ti bepengelandik tinggi.
Nyadi siku injinir, iya meda transformasyen nya siti singkang besai nuju nempa Sarawak ngembuan ekonomi beteknologi tinggi ti ulih besemekih ba renggat entarabansa. -RBI
