KUCHING, 12 Mei Kaban Kunsil Nengeri (ADUN) Telang Usan, Dato Dennis Ngau nerangka pengawa numbuhka Kaunsil Padi enggau Beras Sarawak 2026 nyadi siti singkang ti strategik sereta jauh runding dalam pengawa ngenegapka pengelikun pemakai nengeri tu sereta ngemodenka industri betanam betupi Sarawak.
Nitih ku iya, pengawa numbuhka kaunsil khas ti ngemeratka sepenuh iya ngagai pemansang pengawa nanam padi enggau ngeluarka padi di Sarawak ukai semina inisiatif betanam betupi aja, tang nyadi pelasar ti beguna dalam nempa industri pemakai ti meruan ungkup nengeri jemah ila.
Ku iya, kaunsil nya deka nyadi batang koordinator ti nyambung kesemua rentayan industri padi enggau beras, mungkur perambu kandang endur nanam, pemansang infrastruktur entali ai, ngena mekanisasyen moden, ngatur input betanam betupi baka benih enggau baja, sistem nanam, pemansut, proses, nyimpan nyentuk ke ngagai makit masar ngagai penguna.
Dalam jaku iya ti nyukung Rang Undang-undang (RUU) Kaunsil Padi enggau Beras Sarawak 2026 ba Dewan Undangan Negeri Sarawak, iya madahka Sarawak ngembuan tanah ti galak sereta engkeman endur ngemansangka pengawa betanamka padi chara moden enggau komersil.
“Enggau perambu ke bisi struktur, aku pechaya Sarawak ulih nyapai pemansut beras ngatika diri jemah ila,” ku iya.
Iya mega merambu ngambika Kaunsil Padi enggau Padi Sarawak ti deka ditumbuhka, bejalaika pansik pemisi ba sekeda kandang endur ti bisi potensial di pelilih menua Telang Usan enggau Baram ti deka dikemansangka nyadi kandang endur nanam padi bedandang besai sereta komersial.
Entara kandang menua ke dikelala ngembuan potensial ke besai iya nya Apoh, Ulu Tinjar enggau Baram Tengah ke nitihku iya ngembuan tanah ke chukup, entali ai ke manah sereta engkeman dikemansangka ngena chara betanam betupi moden.
Ku iya nambah, pemansang betanam betupi moden ba kandang menua ulu ukai semina ulih nambahka pemansut pemakai nengeri tang mega ulih muka peluang ekonomi baru ngagai komuniti menua pesisir.
Berebak enggau nya, iya mega ngemeratka pemesai guna teknologi moden, mekanisasyen, data betanam betupi pintar enggau sistem ngatur ladang ti efisyen agi dikena nentuka industri padi di Sarawak ulih mansang enggau lebih kompetitif sereta meruan.
Ku iya, pengawa ngaul raban nembiak mega beguna amat dalam nentuka pengelantang sektor betanam betupi jemah ila.
“Peragam ti ngumbai sektor betanam betupi nadai jemah ila patut diubah.
“Industri tu patut dimoden ngambika nyadi sektor ti beteknologi tinggi sereta mai penguntung ngambika mayuh agi raban nembiak bisi ati deka ngereja pengawa nya,” ku iya.
Nitihku iya, Sarawak deka ngadaka mayuh agi agropreneur moden ba raban nembiak setipak enggau aspirasyen Strategi Pemansang Pasca COVID-19 2030 (PCDS 2030).
Dalam jaku dipansutka iya, iya mega nyemetak madahka pemansang industri padi enggau beras bisi kaul rat enggau aspek pengelikun pemakai, pemansang menua pesisir, peluang kereja, ngurangka penyeranta enggau penumbuh ekonomi nengeri.
Iya mega ngaitka pemesai guna merambu pemakai dalam timpuh ti panjai enggau cherita Nabi Yusuf dalam ‘Kitab Kejadian 41:47–49 ti nyimpan asil ti diketau maya musim ti mayuh dikena nyendiaka diri napi kemarau enggau lapar pungkang.
“Baka Nabi Yusuf merambu nyimpan pemakai dikena napi pengidup dudi hari ti enda tentu, Sarawak kemaya hari tu begunaka penegap ba pengawa ngeluarka pemakai kediri empu,” ku iya.
Ku iya nambah, Sarawak endang amat diberekat enggau tanah ti ami sereta pengeraja ai ti chukup lalu pengelebih tu meseti dikena enggau naka pemanah dikena nentuka pemakai meruan ungkup rebak dudi hari. — RBI
#Beritalban | Ruai Berita Iban
Rinduka | Titihka | Kunsika
Sumber, photo — DENNIS NGAU
