KUCHING, 10 Mei – Perintah Sarawak merambu deka ngambi alih sekeda agi entiti strategik ari Perintah Besai nyadi siti singkang dikena ngenegapka autonomi ekonomi enggau nguasa reta tengkira ke beguna di nengeri tu.
Premier Sarawak, Datuk Patinggi Tan Sri Dr Abang Johari Tun Abang Openg madah, pengawa nya seriris enggau agenda ngerembaika hak Sarawak ari baruh Sempekat Malaysia 1963 (MA63) enggau bejalaika Strategi Pemansang Pengudah COVID-19 2030 (PCDS 2030).
Nitihku iya, dalam timpuh enam taun ke udah, Sarawak udah ngambi sekeda singkang ke besai dikena ngenegapka ekonomi nengeri tu nyengkaum ngambi alih palan kuasa Tekat Kuasa Karan Bakun ari Perintah Besai.
Kelimpah ari nya ku iya, Sarawak mega udah ngambi alih Palan Penyangkai Kapal Bintulu, numbuhka Bank Pemansang Sarawak (DBOS), PETROS, serikat penerebai bilun AirBorneo sereta bulih syer ekuiti majoriti dalam Affin Bank.
“Ke bendar, mayuh agi ke deka diambi kitai ari Perintah Besai,” ku iya lebuh bejaku ba Gempuru Hari Pengereja Pengawa Renggat Sarawak 2026 di Palan Konvensyen Borneo Kuching sehari tu.
Urung 3,000 iku pengereja pengawa ari 34 buah gerempung gawa bisi datai ngulu gempuru nya.
Taja pia, iya enda nerang enggau silik senentang entiti strategik baru ti deka diambi perintah nengeri.
Nitih ku iya, pengawa ngulih sereta numbuhka bemacham entiti strategik dikearap ulih muka mayuh agi peluang kereja ngagai peranak Sarawak.
Berindik enggau nya, iya madahka peranak Sarawak deka diberi latih ke engkeman enggau ngemeratka kus teknikal dikena nangkup guna pengereja pengawa jemah ila.
“Berengkah ari taun tu, Perintah Sarawak bisi nyendiaka 64 bengkah program ba palan pelajar tinggi ke diempu Sarawak dikena ngadaka peranak Sarawak ke landik ba bidang sains, pekara wang enggau undang-undang baru nyengkaum undang-undang siber,” ku iya.
Ba pengerami ke sama, Abang Johari mega bejadika pelasar kereja rasmi perintah nengeri ti dikelala enggau nama Job Sarawak dikena mantu orang ngiga peluang kereja, latih pengelandik enggau setipak kereja enggau pengaji menua tu.
Inisiatif tu sebagi ari pengawa perintah ngenegapka pemansang modal mensia sereta nyendiaka mayuh agi peluang kereja, kelebih agi ba sektor strategik nengeri tu.
Sumber BERNAMA
#ruaiberitaiban#newsiban#beritaiban
Rindu | Titih Kunsika
