PAKAN, 7 Mei – Penyanding Penemu Opis Premier Sarawak (Industri Pemakai, Komoditi enggau Pemansang Kandang Menua), Tan Sri William Mawan Ikom ngelalau piak ti bekaul ngambi atur enggau lengkas sereta lebih nembam dikena ngenegapka bungkur internet di kandang menua Pakan.
Atur tu mega ungkup pengelantang rayat sereta dikena nentuka pemansang menua pesisir ulih dipejalaika enggau inklusif sereta ngasi.
“Penanggul akses internet ke enda manah ba kandang menua Pakan majak nyadi isu berat ti begunaka atur lengkas ari piak ke bekaul, dikena nentuka pemansang menua pesisir enda majak tinggal ba arus perdana digital menua tu.
“Taja bemacham inisiatif nyengkaum ngaga tiang telekomunikasyen udah dipejalaika, tang tikas bungkur internet ba sitak tu agi ba tikas ke enda ngemuaska ati,” ku iya.
Iya madah munyi nya lebuh ngulu Pengerami Ngelancharka Program Projek Transformasyen Menua Pesisir (RTP) ba Rumah Jonathan Mingan kena Hari Tiga tu tadi.
Nitihku iya, pemisi fizikal tiang pemachar enggau perengkaguna telekomunikasyen nadai reti enti rayat agi betapi enggau sambung internet ti laun, enda entap sereta bungkur ti enda lengkap.
“Kitai ulih meda tiang komunikasyen udah digaga, perengkaguna mega udah bisi, tang pekara ke amat iya nya rayat agi ngasaika penanggul akses internet. Pekara tu enda ulih dikemendarka majak nyadi,” ku iya.
Kaban Kunsil Nengeri (ADUN) Pakan nya nyemetak madah, isu nya udah lama dibantaika peranak menua nya, tang nyentuk ke diatu bedau diputarka enggau komprehensif ti ngasuh komuniti menua nya berasai asa.
Ku iya, entara pekara ti bela ngujungka internet tejanggal ba kandang menua nya iya nya pengawa enchuri kabel ti ngeruga penegap rentayan komunikasyen.
Iya nyemetak madahka akses internet kemaya hari tu ukai agi utai ti mar, tang nyadi utai ti beguna amat dalam pengidup besehari-sehari enggau pemansang komuniti menua pesisir.
“Semua pekara kemaya hari tu bepanggai ba internet baka komunikasyen, pelajar, pengawa dagang, nyentukka chara mensia mayuh mansang ke mua. Enti nadai akses ke manah, komuniti menua pesisir deka majak tinggal,” ku iya nerang.
Ku Mawan nambah, pemansang ekonomi digital diatu udah nempa internet nyadi elemen kunsi dalam pengawa rayat ninting hari, nyengkaum transaksyen nadai ngena duit tunai enggau aktiviti dagang nengah ‘online’.
Taja pia, agi bisi peranak di kandang menua Pakan agi bejalaika pengawa sida ngena chara tradisional ketegal penanggul akses internet ti enda chukup. -RBI
