BETONG, Mei 7 — Pengawa jampat Raban Penyaga Orang Periman Malaysia (APM) di Pelilih Menua Betong mujur ngupas jalai nuju sebuah rumah panjai di Jalai Kubal Lidong pengudah diempang pun getah ke tumbang, sehari tu tadi.
Nitihka penerang berita ari APM Betong, raban nya nerima kangau ari Sarawak Energy bekaul enggau penusah nya sebedau seraban sida beguai dianjung ngagai endur nya bejalaika operasyen ngupas sereta nentuka pengelikun penguna jalai alun enggau peranak menua nya.
Lebuh datai ba endur nya, raban operasyen nemu pun getah nya udah tumbang lalu ngempang selampur jalai nuju ngagai rumah panjai nya ngujungka jalai nya enda ulih ditengah perengka pengangkut.
Raban APM udah nya bejalaika pengawa netak ngena perengka khas sebedau meresi reba kayu begulai enggau peranak rumah panjai nya ke bela mantu operasyen nya.
Operasyen nya mujur tembu enggau lanchar lalu jalai nya dibuka baru penuh pengudah pengawa nebang enggau meresi tembu.
Nadai penusah bebadi nyawa diripotka bisi bekaul enggau penusah nya.
APM Betong nyemetak madahka sida seruran nyikap diri nentuka pengelikun enggau pengelantang komuniti lokal terus dijaga, kelebih agi maya betapi enggau gaya penusah ngenyit. -RBI
