JULAU, 6 Mei — Opis Bomba enggau Penyah Penusah Malaysia (JBPM) terus komited ngenegapka pengelikun mensia mayuh nengah pengawa bejalaika Program Penyedar Mensia Mayuh ti ngaul latih mindah ba begunan ke idah diatur ba Sekula Kebangsaan (SK) Ulu Naman, malam ensanus.
Ketuai Balai Bomba enggau Penyah Penusah (BBP) Bintangor, PPgB Mahmudin Naruddin madah, program ke berengkah urung pukul 9 malam nya ngaul 40 iku penyereta ti mungkur bala nembiak, pengajar enggau warden buding.
“Latih tu ngembuan tuju deka nambahka tikas penyikap orang ke nguan begunan, kelebih agi ba sekula bemalam, nyema bisi penusah ngenyit nyadi baka penusah angus,” ku iya.
Nitihku iya, kelimpah ari latih mindahka orang, opis bomba mega bisi ngenataika penerang pandak pasal penyedar pengelikun penusah angus dikena meri penerang tumu ngagai penyereta pasal atur nagang enggau pengawa ke patut dipejalaika maya penusah ngenyit nyadi.
Latih nya betuaika PBK I Mijan Pamin begulai enggau kaban tim BBP Bintangor, enggau semua aktiviti bejalai enggau lanchar sereta teratur.
Ku iya nambah, program baka nya deka terus chakah agi dipejalaika ari setiap maya setipak enggau aspirasyen JBPM dalam nentuka servis ti efisyen, jampat sereta mesra ngagai komuniti. -RBI
