KUCHING, 5 Mei – Siku nembiak lelaki beumur 19 taun ke dipelaba teparuk enggau penusah aksiden ngelantak lalu ngelarika diri ti ngaul siku orang ke ngena basikal ba Jalai Stutong kena 1 Mei tu tadi udah nyerahka diri ngagai polis sehari tu tadi.
Ketuai Polis Pelilih Kuching, ACP Alexson Naga Anak Chabu madah, saspek datai ba Bagi Tasat enggau Penerit Adat Trafik Indu Opis Polis Pelilih (IPD) Kuching urung pukul 12 tengahari sebedau ditan ngambika dipansik silik agi.
Nitihku iya, ba penusah ke nyadi urung pukul 5.50 pagi kena 1 Mei tu tadi, eksiden nya mungkur sebuah basikal enggau sebuah kerita ke dipelabaka Proton Satria.
“Pansik silik tetemuka saspek mai raban polis ngelawa palan penusah nyadi pia mega ngelawa woksop di Batu 4, Kuching, endur nyimpan entukar nya,” ku iya nengah sebengkah penerang sehari tu tadi.
Peresa ai kemi ti dipejalaika ba saspek ditemu negatif sebarang pekara dadah.
Ku iya, saspek deka didawa ba kort pagila ari baruh Seksyen 41(1) Akta Pengangkutan Jalan 1987 ketegal deriba enda beradat ngujungka pemati, kelimpah ari dipansik ari baruh Seksyen 52(2) akta ke sama laban enda ngeripot penusah bebadi dalam timpuh 24 jam.
Berindik enggau nya, raban polis meri besai terima kasih ngagai mensia mayuh ti datai meri penerang dikena mantu tasat kes nya. -RBI
