KUCHING, 5 Mei — Perambu pemansang menua pesisir ti lebih teratur, bestruktur sereta meri empas tinggi meseti dikemerat dikena nentuka tetiap Projek Transformasyen Menua Pesisir (RTP) ulih meri penguntung terus ngagai rayat, kelebih agi di Bagi Menua Betong.
Sapit Premier Sarawak, Datuk Amar Douglas Uggah Embas madah, chara merambu enggau silik sereta nembam ti efektif entara ejensi ti bejalaika pengawa enggau pengari rayat nyadi kunchi pemujur bejalaika projek ba renggat baruh.
Iya madah munyi nya lebuh bejadika Woksyop Nyediaka Rintai RTP Bagi Menua Betong ungkup taun 2027 ke diatur pengelama dua hari berengkah ari 4 ngagai 5 Mei 2026 ba Kuching.
Nitih ku iya, koordinasyen tumu beguna amat dikena nentuka tetiap projek ulih dipejalaika enggau lebih efisyen, efektif sereta setipak enggau guna kandang menua, lalu enggau nya ulih nyeliahka pengelaun tauka tindih dalam pengawa bejalaika projek.
Bengkel tu nyadi pelasar koordinasyen strategik ti ngempuruka mayuh bengkah ejensi pengatur enggau raban dalam ngaga perambu rintai perambu projek RTP ungkup taun 2027.
Kelimpah ari ngemeratka aspek perambu, sesi woksyop nya mega ngemeratka pengawa nyendiaka Bill of Quantities (BQ) dikena nentuka anggar ungkus projek disedia enggau lebih betul sereta sistematik.
Ba woksyop nya, rintai keterubah perambu projek udah dipejuraika sebedau dientaska bala pengari rayat nitihka sitak Parlimen enggau Kunsil Nengeri (DUN) sida empu.
Semua perambu projek ke nangkanka nya deka nengah proses nyendiaka BQ ulih ejensi teknikal sebedau dipasukka ngagai sistem RTPMS enda laun ari 30 Jun 2026.
Pengawa bejalaika woksyop tu dibagi ngagai lima raban besai nitihka kandang endur pentadbiran iya nya Betong, Pusa, Saratok, Kabong enggau Lubok Antu/Engkelili, lalu tetiap raban berandauka guna projek bepelasarka gaya kandang menua.
Asil ari randau nya, sepenyampau 283 projek RTP udah mujur dirintai ti mungkur mayuh bengkah ejensi bejalaika pengawa baka Opis Kereja Raya Sarawak, Opis Parit enggau Entali Ai Sarawak, Opis Bekal Ai Menua Pesisir Sarawak, Opis Menteri Utiliti enggau Telekomunikasyen Sarawak sereta mega Opis Perintah Lokal.
Projek nya mungkur sitak Parlimen enggau DUN nyengkaum sitak P201 Batang Lupar, P204 Betong, N28 Lingga, N29 Beting Maro, N33 Engkelili, N35 Saribas, N36 Layar, N37 Bukit Saban, N38 Kalaka, N39 Krian enggau N40 Kabong.
Ejensi sukung enggau teknikal baka Unit Perambu Ekonomi, SIMU, Sarawak Energy Berhad sereta mega opis pelilih menua di Bagi Menua Betong mega bejalaika tanggungpengawa ti beguna dalam nentuka koordinasyen bejalaika projek enggau chara komprehensif.
Sama bisi datai Kaban Parlimen Betong Dato Dr Richard Rapu, Kaban Kunsil Nengeri (ADUN) Lingga Dayang Noorazah Awang Haji Sohor, ADUN Beting Maro Dato Haji Razaili Gapor, ADUN Kabong Dato Mohd Chee Kadir, pengari kandang menua, Residen Betong Datu Richard Michael Abunawas enggau Sekretari Politik Premier Sarawak Roseline Mapong. -RBI
