BINTULU, 5 Mei — Pengerami Gawai Mangkung Tiang di Rumah Kedi Anak Asam, Sungai Mawang, Batu 35, Jalai Bintulu–Miri diatur enggau penuh adat enggau main asal, kelai pemungkal baru dalam pengawa ngaga rumah panjai ke nyadi pelasar pengidup, identiti enggau pesaka asal komuniti menua tu.
Sungai Mawang ke bepalan ba sepemanjai Jalai Bintulu–Miri nyadi palan endur ngatur pengerami nya ti mandangka penegap nilai budaya, semengat kerejasama enggau penyerakup komuniti.
Pengerami bejadika rumah panjai nya dipenyadika Kaban Kunsil Nengeri (ADUN) Samalaju Datuk Majang Renggi, kena Hari Lima apin lama ti udah.
Datuk Majang nyemetak madahka rumah panjai ukai semina struktur fizikal aja, tang nyadi kelai penyerakup komuniti ti ngempuruka mayuh macham ruang bilik ba baruh siti perabung enggau semengat begulai sereta tuju ke sama.
“Rumah panjai nyadi kelai pengidup komuniti ke nyelai, ke alai tetiap ruang bilik diau begulai dalam pengelantang, bekunsika ruang, semengat enggau tanggungpengawa. Tu meh penegap ke bendar komuniti kitai,” ku iya.
Iya mega meri pengaga ati ngagai komitmen enggau semengat kerejasama ti tinggi ti dipandangka peranak menua nya dalam proses ngaga rumah panjai nya.
Nilai begulai sereta program beripai ti dikemeranka terang ngayanka penyerakup ti rapit enda ngira ari ni penatai.
Kenu ku iya, pengawa adat baka Gawai Mangkung Tiang ukai semina pesaka budaya ke patut dijaga, tang mega ngajar komuniti senentang pemanah basa, kelebih agi ngagai adat, ketuai enggau kaban komuniti.
“Pekara tu nyadi pelasar ti beguna dalam nentuka pengelantang pengidup komuniti terus dijaga sereta ditampung ngagai rebak dudi hari,” ku iya nerang.
Berebak enggau nya, iya nyemetak madahka pengawa ngetanka adat enggau main asal meseti setipak enggau arus pemansang kemaya hari.
Komuniti ku iya, patut nyikap diri napi ubah enggau enda ngelengkaka identiti enggau pesaka ke nyadi teras pengidup.
“Pemansang, pelajar enggau penyulut ekonomi meseti nyingkang setipak enggau pengawa ngintu budaya kitai ngambika sebela ulih dijapai,” ku iya nambah.
Iya ngarapka rumah panjai ke benung digaga nya ukai semina nyadi palan pengentap pendiau aja, tang mega nyadi palan penyerakup komuniti sereta nyadi pelasar ngadaka rebak ti beserakup, ulih idup sereta bisi visyen.
Enggau nya pengerami Gawai Mangkung Tiang mantaika penerus tradisyen komuniti rumah panjai ti majak tegap nyadi pelasar pengidup rama enggau budaya di menua pesisir Sarawak. — RBI
