Komitmen tinggi enggau penyikar pentadbiran Komiti Pemansang enggau Pengelikun Genturung Pendiau (JKKK) Penyulau majak nyadi lebuh bemacham inisiatif pemansang mujur dikeamatka, lalu enggau nya meri empas terus ngagai pengelantang peranak menua nya.
Projek Ngemanahka Jematan Titi Nyadi Kedap Ekonomi
Projek ngemanahka jematan Titi enggau ari baruh Projek Transformasyen Menua Pesisir (RTP) nyadi pengangkat besai ngagai aktiviti ekonomi komuniti, kelebih agi ungkup orang berikan enggau pekebun mit di Kampung Penyulau.
Nitihka penerang ari JKKK Penyulau ngagai Ruai Berita Iban, struktur baru tu nganti jematan kayu lama ke udah lebih 30 taun sereta udah runtuh, lalu enggau nya meri risiko pengelikun ngagai peranak.
Peminta projek nya udah dikenataika ngagai Opis Pelilih Kanowit enggau Opis ADUN N.50 Machan ba taun 2023 nengah keretas kereja ke chukup sereta profesional.
Projek tu udah dikemendar dalam taun 2024 enggau dipejalaika Opis Kaunsil Pelilih Kanowit (KDC) ngena kayu ke dibeli bekualiti tinggi, sebedau tembu penuh dalam taun ke sama lalu dipenyadika Kaban Kunsil Nengeri (ADUN) Allan Siden Gramong kena 13 September 2025.
Atur Ketuai Bepelasarka Literasyen Digital Nyadi Penyungkak
Pemujur tu nitihka penerang ke sama, dipejalai ketegal pengeransing ngatur projek enggau nguasa teknologi digital ba raban ketuai JKKK.
Sekretari JKKK bejalaika tanggungpengawa ti beguna dalam ngatur dokumentasyen projek ngena chara digital, nyengkaum nyendiaka keretas perambu, pelin endur enggau ripot gambar nitihka standard ejensi perintah.
Kelimpah ari nya, iya mega nyadi ketuai operasyen ba palan nengah chara matau kediri empu atur bejalaika pengawa fizikal dikena nentuka kualiti projek nya dijamin.
“Pengelandik ngatur projek enggau sistematik sereta bepelasarka teknologi beguna amat dikena nentuka tetiap peminta pemansang nerima perati enggau pemendar ke patut,” ku JKKK Penyulau.
Kerejasama JKKK Ngasilka Bemacham Pemujur
Kenyau ari taun 2022, kerejasama rat semua kaban JKKK Penyulau udah ngasilka bemacham pemujur bukai ti meri pemaik ti komprehensif ngagai komuniti.
Nitihku JKKK Penyulau, entara inisiatif iya nya ngenegapka pengawa merintah enggau daya idup ba rumah panjai nengah pengawa ngulihka kereban opis enggau bejalaika aktiviti besaup ngelikunka rampa menua.
Kelimpah ari nya, Program Sejati MADANI mega dipejalai nengah projek nupi ikan ai tabar ngena sistem RAS (tangki HDPE) ti diatur kompeni ari sukut teknikal enggau nadai ngaul kunteriktor luar.
Ba pemansang ke bekaul, projek ngangkatmanah kuasa karan ari baruh RTP ti ngaul 23 buah rumah diatu benung dipejalaika lalu dipelaba tembu dalam bulan Ogos 2026.
Inspirasyen Pemansang Menua Pesisir
Sechara penuh, pemujur JKKK Penyulau mandangka pemesai guna integriti pentadbiran, pengelandik ngatur projek enggau nguasa literasyen digital nyadi pematak besai pemansang menua pesisir.
“Sukung komuniti ke tegap sereta penyikar ngatur pengawa nyadi pekara kunsi dikena nentuka tetiap projek ke diperambu ulih dipejalaika enggau mujur,” ku JKKK Penyulau. -RBI
#ruaiberitaiban#newsiban#beritaiban
Rindu | Titih | Kunsika
Photo — Jkkk Penyulau Kanowit
