BINTULU, 30 April — Kaban Kunsil Nengeri (ADUN) Samalaju, Datuk Majang Renggi udah bejadika Woksyop Ngenegapka Ketuai Raban Bansa ke diatur Gerempung Ketuai Kaum Zon Samalaju, Suai ke ba sebuah hotel ditu kena Hari Satu tu tadi.
Woksyop tu nyadi inisiatif strategik dalam pengawa ngenegapka pangku pengawa Ketuai Raban Bansa nyadi tiang ketuai komuniti ba renggat baruh.
Dalam jaku dipansutka iya, iya nyemetak madahka dalam napi pemar kemaya hari, Ketuai Kaum ukai semina bejalaika tanggungpengawa nyadi penyaga adat, tang mega nyadi fasilitator pemansang enggau kaul ti efektif entara rayat enggau perintah.
Sepemanjai atur pengawa nya, pesereta nyereta diisi bemacham isi ti meri nilai tambah, nyengkaum bekunsika penemu bekaul enggau adat Iban baka adat melaki bini, adat tebalu, adat ruang bilik enggau hak orang indu dalam institusyen ruang bilik.
Pengawa tu dipeda besai reti dalam nentuka penerus pesaka asal ngambika iya terus dijaga sereta dikemeranka setipak enggau arus pemansang kemaya hari.
Kelimpah ari nya, bala pesereta mega bisi dipeda enggau randau penyedar pasal penusah salah guna dadah enggau chara nagang, seriris enggau komitmen ti seruran dipejalaika dikena nempa komuniti ti bepengerai, likun sereta tan.
Ba hari kedua, woksyop nya ngemeratka sukut pengawa merintah enggau nyadi ketuai, kelebih agi bekaul enggau pangku pengawa enggau tanggungpengawa Ketuai Raban Bansa bepelasarka penetap Ordinan Kort Bansa Asal 1992.
Sama bisi dikemerat iya nya pengelandik ngatur protokol, bejaku ba mua mayuh sereta nyendiaka minit aum ti sistematik sereta efektif.
Woksyop ke diatur pengelama dua hari, berengkah ari 27 ngagai 28 April 2026 dikearap ulih ngenegapka kapasiti nyadi ketuai Ketuai Raban Bansa ngambika sida seruran relevan, bekuasa sereta ulih meransang pengelantang komuniti selampur.
Berebak enggau nya, Datuk Majang Renggi mega ngenataika pengaga ati iya ngagai raban pengatur ti udah bebendar ngatur program ti meri penguntung tu.
Iya ngarapka inisiatif baka tu terus ditegapka dikena nentuka penerus adat, pengelantang rama enggau pemansang komuniti ti meruan, kelebih agi ba kandang menua Samalaju. — RBI
#Beritalban | Ruai Berita Iban
Rinduka | Titihka | Kunsika
