KUCHING, 28 April — Program Kembara Inspirasyen Nembiak Renggat Baruh (KIBAR) 2026 Siri 1 ungkup Zon Borneo udah mujur diatur ba Dewan Kampung Semeba, ditu kemari, nyadi pengawa ti enda ngetu dikena ngenegapka kaul enggau ngenegapka raban nembiak renggat baruh.
Program tu ditembuka enggau penatai Menteri Nembiak enggau Lumba enggau Main, Dr.Mohammed Taufiq Johari, ngatur penemuai betemu enggau mayuh macham renggat nembiak dalam pemgerami ti richah sereta interaktif.
Penatai iya mandangka komitmen perintah deka ngelawa raban nembiak terus sereta meretika aspirasyen sida.
Nitihka penerang ari Opis Nembiak enggau Lumba Menua, pengawa ngatur KIBAR ukai semina nyadi pelasar ngenataika penerang aja, tang mega nyadi medium strategik dikena mendingka penemu, guna enggau pemar ke ditapi raban nembiak, kelebih agi ba renggat baruh.
Timbal ke diulih nengah sesi ‘town hall’ nya deka nyadi input ke beguna dalam ngaga polisi menua sereta bejalaika program opis menteri nya jemah ila.
Berebak enggau nya, program tu mega ngemeratka pemesai guna ngenegapka raban nembiak, kelebih agi sida di menua pesisir enggau sida ke bedau nyereta gerempung, enggau penemu sereta pengelandik teknologi ngambika ulih besemekih ba renggat ASEAN enggau global.
Elemen lumba enggau main mega terus dikemeratka nyadi kereban ti beguna dalam nerenakka penyerakup enggau gaya pengidup ti bepengerai entara komuniti.
Sama bisi datai Menteri Pemansang Nembiak Lumba enggau Main Sarawak, Datuk Abdul Karim Rahman Hamzah; Sapit Menteri Nembiak enggau Lumba enggau Main, Mordi Bimol; Sapit Menteri Pemansang Nembiak, Lumba enggau Main enggau Orang Dagang Sarawak (Nembiak enggau Lumba), Datuk Gerald Rentap Jabu; Sekretari Besai Opis Menteri Nembiak enggau Lumba, Rahimi Ismail; Ketuai Direktor Opis Nembiak enggau Lumba Menua, Azura Abidin; enggau Direktor Opis Nembiak enggau Lumba Nengeri Sarawak, Lamat Nyalau. — RBI
