KUCHING, 18 April – Sapit Menteri ba Opis Premier Sarawak, Datuk Abdullah Saidol nyemetak madahka perintah Sarawak ari baruh iring Datuk Patinggi Tan Sri Dr Abang Johari bin Tun Abang Openg nadai kala bisi niat tauka ngambi singkang masuk champur dalam pekara politik tauka pentadbiran nengeri bukai di Malaysia.
Ku iya, pentadbiran ke diatu fokus penuh ngagai pemansang Sarawak, nyengkaum aspek infrastruktur, penumbuh ekonomi enggau pengelantang rayat nengah polisi ke terang sereta bejalaika pengawa enggau betul.
Iya nibarka jaku munyi tu bekaul jaku ti majak viral ba media rama, ti madahka Gerempung Parti Sarawak (GPS) berunding deka bediri minta pilih di Sabah ba pengawa bepilih besai menua ti deka datai, nya berita pelesu sereta ditempa enggau ati ti enda lurus.
“Aku nyemetak madahka nadai sebarang penerang sekalika terus tauka enda kala dipansutka Chairman GPS ke mega Premier Sarawak, bekaul enggau pekara nya.
“Nadai bukti Datuk Patinggi Tan Sri Abang Johari kala mansutka sebarang penerang baka nya.
“Pekara ti dipansutka ba media rama nya terang bendar sebengkah chara petenah politik ti pabu sereta dikena ngenataika saru penemu enggau ngeruga pengelantang entara rayat Sabah enggau Sarawak,” ku iya.
Nitih ku iya, tuduh pelesu ke dikerembai ba platform baka TikTok enggau Facebook nuduh GPS dipelabaka merambu deka ngerembaika pengawa politik ngagai Sabah bediri minta pilih ba penuduk parlimen, enggau tuju ngenegapka sada nyawa blok Borneo.
Abdullah mega nerangka rambai jaku ‘Sarawak First’ ukai semina ngetanka hak nengeri tu aja, tang mega mandangka komitmen perintah nengeri dalam ngemansangka Sarawak nengah ekosistem ekonomi moden, infrastruktur ke manah sereta pengelantang rayat.
Ku iya nambah, perintah Sarawak seruran tebuka ngagai kerejasama ti tegap enggau sebarang nengeri ungkup pemaik pemansang menua enggau pengelantang rayat.
“Sentimen negatif tauka jaku ti enda betul ba politik tau ngasuh penyarut ti enda meri penguntung, tang ulih ngelemika sereta ngachau pengawa bejalaika agenda pemansang ba renggat nengeri enggau menua,” ku iya.
Abdullah Saidol mega nerangka dalam gaya ekonomi dunya ti enda tentu berindik ari penyarut di Timur Tengah, Premier Sarawak bedau lama tu tadi madahka bantu belanja tambah ngagai peranak Sarawak ti kena pangka ketegal ungkus pengidup niki. -RBI
