BARAM, 17 April — Program Ketuai Begulai enggau Rayat ke nyadi ba Rumah Diana Fidelis Antas, Munggu Sikup, Sungai Peking, Tinjar kena Hari Enam tu tadi mujur dipejalaika enggau semengat sepenemu sereta kerejasama rat entara komuniti menua nya.
Program tu diperindang enggau penatai Kaban Kunsil Nengeri (ADUN) Marudi YB Datuk Dr. Penguang Anak Manggil begulai enggau bini iya, Datin Monica Ukong, sereta mega beberapa iku ketuai enggau pengari ejensi nyengkaum pengari Pemesai Pelilih Beluru, SAO Deo Kenneth, Chairman Kaunsil Pelilih Marudi, Cr. Edward Mendai, pia mega Pemanca Enggah Muga, bala penghulu sereta tuai-tuai rumah ari kandang Tinjar.
Dalam penerang ti dipansutka nengah Facebook Rh Diana Fidelis Antas, Munggu Sikup Sungai Peking Tinjar Baram, jaku puji ti pemadu tinggi dikenataika ngagai semua piak ti bisi datai sereta meri sukung ti tegap dalam ngemujurka program nya.
Penatai bala ketuai enggau komuniti nyata mandangka komitmen begulai dalam ngerapitka kaul entara ketuai enggau rayat ba renggat baruh.
“Terima kasih mega dikenataika ngagai semua peranak Munggu Sikup ti udah bebendar nyediaka semua peminta program nyengkaum makai makai, ngirup enggau pengawa nyediaka diri ke bukai dikena nentuka pengelanchar pengerami nya.
“Semengat kerejasama ti dipandangka peranak Munggu Sikup endang patut dipuji sereta nyadi chunto pemadu manah dalam nerenakka penyerakup komuniti,” ku penerang nya.
Program baka tu dipeda nyadi pelasar ke beguna dalam mai bala ketuai ngenyemakka diri enggau rayat kelimpah ngenegapka semengat begulai, setipak enggau aspirasyen pemansang komuniti menua pesisir ti meruan sereta inklusif. — RBI
