KUCHING, 15 April — Siku ular sawa ke ngembuan pemesai urung tujuh kaki pemanjai mujur ditangkap raban Raban Penyaga Pengelikun Mensia Mayuh Malaysia (APM) Pelilih Kuching dalam operasyen di Kampung Segedup, sehari tu tadi.
Nitihka penerang rasmi, APM Kuching nerima kangau ari mensia mayuh ti ngeripotka bisi ular sawa ba laman rumah sida, lalu enggau nya meri pengirau ati ngagai pengelikun orang ke nguan rumah nya.
Berindik ari ripot nya, seraban raban APM udah dianjung ngagai endur nya bejalaika operasyen nangkap reptilia nya.
Asil ari pengawa ke jampat sereta efisyen, ular sawa ke berat 16.69 kilogram nya mujur ditangkap enggau likun nadai sebarang penusah ke enda manah nyadi.
Operasyen nya dipejalaika enggau penuh profesionalisme sereta nitihka prosedur operasyen standard (SOP) ti udah ditetapka dikena nentuka pengelikun mensia mayuh seruran dijaga.
Situasyen ba endur nya diripotka ulih dijaga baru pengudah jelu nya mujur dipindahka APM.
Berindik enggau nya, mensia mayuh dilalau seruran bejejaga sereta lengkas betanya ngagai piak bekuasa nyema betapi enggau penusah ngenyit bekaul enggau jelu siga.
Sebarang penusah ngenyit tau dipadah ngagai APM Kuching nengah lumur 082-252940 tauka 082-252941, tauka talipaun penusah ngenyit 999. — RBI
