MERADONG, 14 April – Ketuai Polis Pelilih Meradong DSP Tansli Mering madahka siku lelaki peranak menua tu beumur 34 taun udah didawa ari baruh Seksyen 39C(1) Akta Dadah Berbahaya 1952 ba Kort Sesyen Sarikei, sehari tu.
Nitihka penerang iya, dawa ngagai orang ke dituduh nya digaga Bagi Pansik Jenayah Narkotik IPD Meradong bekaul enggau lumur kes SKI-62D-33-4/2026.
Orang ke dituduh nya dibai ngagai mua Hakim ke Dipebasa Puan Stella Augustine Druce ketegal ke udah kala diukum lebih ari dua kali ari baruh Seksyen 15(1)(a) Akta Dadah Berbahaya 1952.
“Pengawa meresa tetemuka orang ke dituduh nya bisi empat rikod sebedau tu bekaul enggau penyalah dadah,” ku iya nengah siti penerang.
Kot udah nya ngukum iya enam taun jil, dua kali sipat enggau dua taun dikemataka.
Pengawa bedawa kes nya dipejalaika Sapit Pendawa Raya Sarikei, Aiman Zarith bin Zahrrullail.
Ku iya nambah, Seksyen 39C(1) Akta Dadah Berbahaya 1952 nyendiaka ukum maksimum nyentuk tujuh taun jil enggau tiga kali sipat rotan enti diukum salah.
Berebak enggau nya, raban polis IPD Meradong nyemetak madahka sida enda belembut ba sebarang aktiviti salah guna dadah lalu beratika isu nya berat ba raban bansa.
Mensia mayuh ke bisi penerang bekaul enggau aktiviti dadah di pelilih Meradong dipinta nyalurka penerang ngagai Balai Polis Bintangor nengah lumur 084-693222. -RBI
