KUCHING, 7 April – Opis Kereja Raya (JKR) Sarawak bejalaika tanggungpengawa ke beguna amat nyadi ejensi rintai mua bejalaika pemansang nengeri, lalu udah mai ubah ke besai ngagai rampa infrastruktur Sarawak.
Sapit Premier Sarawak, Datuk Amar Douglas Uggah Embas madah, iya ngarika rayat meri pengaga ati ngagai komitmen enggau penyakah JKR ti udah nempa pemansang infrastruktur nengeri tu.
Ba pemansang ke sebaka, iya madahka RM3 bilion wang turu tambah udah dikemendarka Premier Sarawak dikena melanja projek ke enda ulih dipasuk dalam Atur Pemansang Malaysia Lumpar Ke-13 (RMK-13).
Nitih ku iya, pemendar nya mandangka pengandal penuh ketuai nengeri ngagai pengulih JKR Sarawak bejalaika projek pemansang enggau engkeman ke pemaik rayat di serata nengeri.
Ku iya, sukung nya beguna amat laban Sarawak chakah ngenegapka penyambung enggau infrastruktur pemun, nyengkaum inisiatif besai ngambi jalai batang ungkup dikemansang ke udah bisi enggau ke udah ditinggalka ti dikumbai iya “game changer”, kelebih agi di menua pesisir.
Iya madah munyi nya lebuh bejaku ba Pengerami Nerima Pengabang Aidilfitri Opis Kereja Raya Sarawak ba Dewan UNIFOR kena Hari Satu tu tadi.
Ku iya nambah, entara pemerat udah tu iya nya ngamatka pengawa ngambi jalai batang lalu dikemansang ti udah ditinggal enggau ke udah bisi, ti dipelabaka meri empas besai ngagai rentayan jalai alun nengeri tu, kelebih agi di Miri enggau Kapit.
Uggah ke mega Menteri Infrastruktur enggau Pemansang Palan Penyangkai Kapal madah, inisiatif nya begunaka komitmen ke tinggi ari semua staf JKR, berindik ari skop ke besai sereta pemar logistik ba kandang menua ulu.
Taja pia, iya nyemetak madahka pengawa nya beguna amat dikena ngangkatka akses ungkup komuniti menua pesisir kelimpah ari meransang penumbuh ekonomi kandang menua.
Iya mega madahka pengulih JKR Sarawak bejalaika pengawa nya nyadi siti ari batang pekara dalam perintah nengeri, terus ngenataika sukung belanja ke besai, nyengkaum ungkup projek ke di luar agih belanja perintah besai.
Berebak enggau nya, iya nesau semua pengereja pengawa Opis Kereja Raya Sarawak ngambika terus bekerejasama nyadi siti tim nentuka juluk pemansang nengeri tu nyengkaum juluk deka nempa Sarawak nyadi pelilih menua bepenatai pemisi tinggi manggai ba taun 2030 ulih nyadi nyata. -RBI
