BETONG, 3 April — Pengawa ngaga Replika Kuta Rentap di Bukit Sadok ti mungkur ungkus sepenyampau RM54 juta dikearapka ulih nyadi pelasar baru ngagai pemansang sektor dagang temuai di Bagi Menua Betong, lalu enggau nya ulih nyungkak ekonomi menua tu sereta ngenegapka pengawa ngintu pesaka sejarah Sarawak.
Sapit Premier Sarawak, Datuk Amar Douglas Uggah Embas madah, projek nya nyengkaum pengawa ngaga replika kuta ke beungkus RM16 juta enggau ngaga jalai tama ke beungkus RM38 juta, ti nyadi inisiatif strategik dikena muka potensial Bukit Sadok nyadi palan dagang temuai ti meri empas tinggi.
Nitih ku iya, pemansang nya deka nambahka akses ngagai Bukit Sadok nengah sambung jalai darat ari Sibu, Sri Aman enggau Kuching, kelimpah ari perengka guna langit nengah Bebuling STOLport ti disadang tembu jemah ila.
“Enti udah tembu ila, Replika Kuta Rentap deka nyadi sebengkah ari batang palan dagang temuai di Betong, lalu ari nya ulih nambahka pun penatai pemisi peranak menua nya kelimpah ari asil ke bisi diatu ari lada, sawit enggau getah,” ku iya lebuh bejaku ba Pengerami Nasih Tanah Projek Rayat Ngaga Replika Kuta Rentap ba Bukit Sadok baru-baru tu tadi.
Ku iya nambah, projek tu ukai semina deka ngidupka baru rega sejarah bejuang bujang berani Iban, Rentap, tang mega dikearap ulih meri pemaik ngagai komuniti ngelingi nengah peluang gawa, nambahka aktiviti dagang enggau penumbuh penatai pemisi ruang bilik.
Ungkup Renggat 1, pemansang replika nya mungkur pengawa ngaga 10 unit rumah ke penuh enggau perengka guna pantri enggau bilik mandi, sereta mega elemen arkitektur tradisional baka tanju, panggau, ruai enggau tempuan, kelimpah ari palan penerang ungkup tuju interpretasyen pelajar enggau sejarah.
Berebak enggau nya, Uggah madahka pemansang nya mega dikearap ulih meri pemaik ngagai perintah nengah penambah penatai pemisi bekaul enggau dagang temuai, kelimpah meransang penumbuh industri sukung nyengkaum hotel, restoran, perengka pengangkut enggau servis dagang temuai.
Iya mega nyemetak madahka projek tu ulih ngenegapka agi pengawa ngintu pesaka asal enggau sejarah menua tu nengah pengawa ngangkatka penyedar mensia mayuh sentang pemesai guna Bukit Sadok ti ngembuan rega dalam sejarah perjuangan komuniti Dayak di Sarawak.
Kelimpah ari nya, chara pemansang dagang temuai ti meruan ti benung dikena dikearapka ulih nyukung agenda ngintu rampa menua kelimpah ari ngerembaika kaul budaya enggau temuai ari dalam enggau luar menua.
Pengerami nya bela digulu Kaban Parlimen Betong Dato Dr Richard Rapu, Penyanding Penemu Pansik Saintifik Sarawak Datuk Patinggi Tan Sri Dr Alfred Jabu Numpang, Sekretari Kaunsil Pelilih Betong Lister Clement Guwie enggau Temenggong Richard Mulok. — RBI
