PUTRAJAYA, 2 April — Premier Sarawak Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg ngulu Aum Khas Menteri Besai enggau Kepala Menteri Taun 2026 ba Dewan Aum, Bengunan Perdana Putra, Putrajaya kena Hari Empat.
Sama bisi nyempulang Premier Sarawak ngagai aum nya Sekretari Perintah Nengeri Sarawak Datuk Amar Mohamad Abu Bakar Marzuki.
Aum nya bechairmanka Menteri Besai Dato Sri Anwar Ibrahim lalu bela digulu bala Menteri Besai enggau Kepala Menteri semua nengeri.
Dato Sri Anwar Ibrahim nengah penerang iya nengah Facebook madahka aum nya nyadi pelasar ke beguna dikena mansik enggau komprehensif pemansang krisis kuasa dunya berindik ari penyarut ke nyadi di Asia Barat.
“Chara ti diambi bepelasarka data enggau realiti kemaya hari, ngambika tetiap ketuai nengeri ulih bejalaika pengawa sebaka, beserakup sereta bepelasarka fakta enggau Perintah Besai.”
“Dalam langkar tu, Perintah benung ngerapitka perambu chara ti bejimat sereta komprehensif dikena mutarka mayuh macham peluang, nyengkaum nentuka penerus bekal kuasa menua seruran dijamin dalam sebarang situasyen.”
“Fokus Perintah MADANI mengkang tegap sereta enda bechiping, nentuka penegap bekal, nagang tekan rega sereta nyaga rayat ari empas terus krisis tu,” ku Menteri Besai.
Tekala nya pengudah aum nya, Premier Sarawak mega bisi ngatu betunga mua begulai enggau Dato Sri Anwar Ibrahim ba Opis Menteri Besai. — RBI
