ENGKILILI, 2 April — Peranak Rumah Velly, Sungai Pinang, Ulu Skrang meri pengaga ati ngagai pengibuh Kaban Kunsil Nengeri (ADUN) ungkup sitak N.33 Engkelili, Dr Johnical Rayong Ngipa, dalam pengawa ngenegapka Program bejalaika projek pemansang menua pesisir nengah atur pengawa Transformasyen Menua Pesisir (RTP).
Nitihka penerang ti dikunsi Tuai Rumah Velly Ak Rabong (Painggie), sukung ti enda ngetu dibai pengari rayat nya chukup dikerindu sereta meri empas positif ngagai pengelantang pendiau peranak menua nya.
“Kami peranak Rh Velly, Sungai Pinang, Ulu Skrang meri besai terima kasih ke pemadu tinggi sereta tabi puji ngagai YB Dr. Johnical Rayong Ngipa ketegal pengibuh enggau sukung ti enda ngetu ngagai komuniti kami nengah pengawa nyendiaka projek ari baruh Program Transformasyen Menua Pesisir (RTP),” ku penerang nya.
Ku iya nambah, penatai ejensi bejalaika projek ari Kaunsil Pelilih Lubok Antu ti betuaika Cik Rachel enggau tim ngagai rumah panjai ti dikerandau meresa sereta ngelala palan projek nya mandangka komitmen ti tinggi dalam nentuka pengawa bejalaika projek bejalai enggau lanchar.
“Penatai tu nyata mandangka pemerat enggau pengelurus ati YB Dr. Johnical dalam nentuka tetiap projek ti diperambu ulih dipejalaika enggau manah, beatur sereta meri penguntung penuh ngagai rayat,” ku iya nambah.
Penemuai nya sebagi ari pengawa dikena nentuka tetiap inisiatif pemansang ti diperambu amat-amat nangkup guna peranak sereta meri pemaik ungkup timpuh panjai ngagai komuniti menua pesisir ba kandang menua Ulu Skrang. — RBI
