KAPIT, 23 Mac — Menteri Kereja Raya, Dato Sri Alexander Nanta Linggi ngemeratka komitmen perintah ti terus dalam nentuka pengelantang enggau pemansang rayat terus dikemeratka, kelebih agi ba kandang menua pesisir baka ba Kapit.
Iya ke mega Kaban Parlimen Kapit madah munyi nya lebuh bejadika Aum Ketuai Begulai Enggau Rayat ke diatur ba Rumah Josceline Lia Endau, Emperan Pedalai Mansau, Mumu, ditu, sehari tu tadi.
Nitih ku iya, taja pan tanggungpengawa nyadi Menteri Kereja Raya begunaka komitmen ke tinggi di serata menua, tang iya tetap bebendar ngena awak ba palan nyapai sereta mendingka diri empu peminta rayat ba sitak Parlimen Kapit.
“Ukai muntang ba aku suah di Kapit, tang sitak tu seruran semak ba ati aku lalu aku deka terus bebendar begulai enggau rayat,” ku iya.
Dalam jaku dipansutka iya, iya nyemetak madahka perintah bebendar deka nentuka pemansang inklusif, nadai ngelimpangka sebarang piak, setipak enggau penuduk wang Sarawak ti majak tegap.
Iya mega nerangka penumbuh Ejensi Pemansang Ulu Rajang (URDA) siti singkang strategik dalam ngenyampatka pemansang pelilih menua Kapit enggau kandang menua ngelingi nya.
“Enggau penegap ke dikembuan kitai, kitai diatu ulih minta hak Sarawak enggau efektif agi ari Perintah Besai,” ku iya nambah.
Berebak enggau nya, iya madahka Perintah Besai ari baruh iring Menteri Besai Datuk Seri Anwar Ibrahim nengah penemu Malaysia MADANI terus ngemeratka pemansang ti sebela, enggau agih belanja lebih RM1 bilion diungkup projek pemansang di Kapit.
Entara projek besai ti dipejalaika nyengkaum ngaga jalai ba sepiak kiba mudik Batang Rajang kelimpah ari projek ngaga jematan meraka sungai ti beungkus lebih RM300 juta.
Kelimpah ari nya, asil ari randau enggau Menteri Besai ba taun 2024, perintah mega ngemendarka pengawa ngaga jalai alun terus ngagai Nanga Seranau enggau ungkus anggar urung RM400 juta.
Projek bukai ke bela dipejalaika iya nya projek ngaga jematan ba Sungai Kapit ke beungkus lebih RM100 juta enggau ngaga Indu Opis Polis Pelilih Menua (IPD) baru ke beungkus lebih RM132 juta.
Dalam pengawa ngenegapka pelajar enggau pemansang modal mensia, pengawa ngaga Kolej Profesional MARA di Kapit mega bisi diperambu, lalu ngujungka penyampau semua rega projek pemansang di sitak nya manggai lebih RM1 bilion.
Ngenang silik agi, Nanta madahka semua inisiatif tu asil ari kerejasama rat entara Perintah Besai enggau Perintah Nengeri, pia mega komitmen pengari rayat ke terus bebendar dalam nentuka pengelantang pendiau rayat terus dijaga.
Ba pengerami ke sama, pengawa masang perengka guna internet satelit Starlink mega dipejalaika dikena nambahka akses internet ba kandang rumah panjai, lalu enggau nya ngerapitka seraka digital menua pesisir.
Kelai sukung ngagai komuniti menua nya, iya mega bisi madahka agih belanja penyampau RM30,000 dikena ngaga stor enggau dapur, lalu pia mega RM15,000 ungkup Komiti Pemansang enggau Pengelikun Genturung Pendiau (JKKK).
Iya mega ngingatka rayat ngambika seruran nyikap diri napi sebarang pekara ti deka nyadi nyengkaum pengawa bepilih nengeri, seraya ngemeratka pemesai guna penyerakup enggau kerejasama dalam nentuka pemansang Kapit terus maju sereta lantang.
Sama bisi datai Sapit Menteri ba Opis Premier Sarawak (Undang-Undang enggau Adat Bumiputera), Datuk Jefferson Jamit Unyat. — RBI
