Kaban Kunsil Nengeri (ADUN) N.49 Ngemah, Anyi Jana madahka, semua renggat ari tuai bilik, Tuai Rumah, Penghulu, Pemancha nyentuk ngagai Temenggung bejalaika tanggungpengawa ti beguna dalam nentuka pengelantang enggau penyulut komuniti dijaga.
Iya mega nyemetak madahka tetiap iku ketuai meseti ngembuan pelin ke nyemetak sereta strategik laban enti nadai perambu ke silik, pemansang pedis deka dijapai enggau manah.
“Kerejasama rat entara ketuai ba semua renggat mega deka nyadi batang kunchi pemujur,” ku iya.
Anyi mansutka jaku tu ba Pengerami Ketuai Begulai enggau Rayat sereta Pengawa Bejadika Projek RTP 2025 ba Rumah Dolly Nanga Dap ti nyadi sehari tu.
Program tu ukai semina nyadi pelasar ngenataika polisi, tang mega ngerapitka kaul entara ketuai enggau rayat setipak enggau aspirasyen pemansang ti inklusif sereta meruan di Sarawak.
Berindik enggau nya, iya madahka pemansang di kandang menua Nanga Dap majak ditegapka enggau bemacham inisiatif perintah.
“Pemansang tu nyengkaum nyendiaka sebuah sekula sekondari enggau dua buah sekula primari, lalu enggau nya ngayanka komitmen iya ti seruran deka nambahka akses pelajar di menua pesisir,” ku Anyi.
Dalam jaku dipansutka iya mega, Anyi nerangka projek nengah Program Transformasyen Menua Pesisir (RTP) nyadi inisiatif perintah dikena nentuka pemansang datai ba renggat baruh, lalu ari nya ulih ngangkatka perengka guna pemun enggau pengelantang rayat ba selampur.
Iya mega ngelansa madahka pemansang politik kemaya hari, iya mantaika pengandal ati ke Pengawa Bepilih Nengeri (PRN) Sarawak deka diatur taun tu, seraya minta rayat ba sitak N.49 Ngemah terus meri sukung ke tegap ngagai perintah Gempung Parti Sarawak (GPS) dikena nentuka penerus pemansang. – RBI
