MIRI, 17 Mac – Projek ngaga palan entepan kerita baru ba Begunan FORUM ditu ke beungkus RM966,896.60 udah tembu penuh kena 3 Oktober 2025 pengudah diserah ngagai kunteriktor kena 11 Julai 2025.
Pengawa bejalaika projek nya meda penambah 155 palan endur entepan kerita baru, lalu enggau nya nambahka penyampau kapasiti ngagai 255 palan dikena nangkup peminta penguna ke majak nambah.
Sapit Menteri ba Opis Premier Sarawak (Kuasa Kerja, Imigresen enggau Pematau Projek), Datuk Gerawat Gala madah, palan nya siti singkang ke beguna dalam ngangkatka pengelantang mensia mayuh, kelebih agi bala temuai enggau penyuwa begunan nya.
“Penambah palan entepan ti lebih teratur sereta chukup ukai semina ulih mantu ngurangka penyekut, tang mega ulih ngemanahka agi arus trafik ba kandang ngelingi,” ku iya lebuh bejadika palan nya sehari tu.
Nitihku iya, inisiatif nya mandangka komitmen perintah ti seruran bejalaika pengawa ngemanahka infrastruktur mensia mayuh ti lebih sistematik, likun sereta ‘mesra’ penguna, setipak enggau guna pemansang mengeri ti majak jampat.
Ku iya nambah, fasiliti nya dikearap ulih meri empas ke manah ngagai aktiviti ekonomi kandang menua sereta ngangkatka imej Begunan FORUM nyadi palan ke lebih kondusif sereta efisyen.
Berebak enggau nya, iya mega ngenataika pengaga ati ngagai semua piak ti bisi kaul ngemujurka projek nya lalu ngarapka perengka guna ti disedia ulih dikena enggau penuh sereta diintu enggau manah ungkup pemaik begulai. -RBI
