LONG BANGA, 4 Mac — Jematan Sungai Peluan sepemanjai 43 meter diatu udah tembu penuh enggau meruan sereta dibuka dikena komuniti menua nya.
Nitihka penerang ari Opis Kereja Raya Sarawak, pengawa ngaga jematan nya siti singkang ke besai reti dalam ngenegapka rentayan infrastruktur menua pesisir, kelebih agi ba pengawa ngangkatka aksesibiliti enggau pengelikun ungkup peranak di menua pesisir.
“Pengawa ngaga jematan tu ngemuntangka pemindah komuniti menua pesisir sereta ngangkatka tikas pengelikun enggau penyambung rentayan jalai alun di menua pesisir,” ku penerang nya nambah.
Projek tu mega ngayanka komitmen opis nya terus bejalaika Program Transformasyen Jematan Menua Pesisir (RBTP) nyadi inisiatif strategik dikena ngenegapka perengka guna infrastruktur asas sereta ngangkatka kualiti pengidup komuniti menua pesisir di Sarawak.
Opis Kereja Raya Sarawak nandu baru komitmen sida deka terus bejalaika projek pemansang ti meri empas tinggi ungkup pengelantang rayat, setipak enggau aspirasyen pemansang nengeri tu. — RBI
