KUCHING, 4 Julai – Pengelebas bejaku nya hak ti dijamin ngagai genap iku individu, tang iya meseti dipejalaika enggau penuh tanggungpengawa ngambika enda disalahguna nyentukka ngerembaika penerang ti bula, ngelimpangka runding tauka ngeruga penyerakup rama.
Bepelasarka prinsip nya, Opis Sekretari Politik Premier Sarawak sehari tu ngaga ripot polis bekaul enggau tulis ba Facebook ti dikumbai ngundan elemen petenah, penerang ti salah sereta bisi potensial ngasut sentimen bansa.
Sekretari Politik Premier Sarawak, Susan Clement Ingun madah, ripot nya digaga berindik ari tulis ari akaun Facebook ngena nama ‘Nempy Jman’ dalam raban ‘NCR Sarawak’, ti dipelabaka mandangka tajuk berita ti udah diubah nyentukka ulih nyaru runding mensia mayuh.
“Pengelepas mansutka jaku meseti disempulang enggau tanggungpengawa dikena nentuka tetiap penerang ke dikunsi nya betul sereta enda ngeruga sebarang piak,” ku iya madah ngagai pengarang berita pengudah ngaga ripot ba Balai Polis Satok, kena Hari Enam tu tadi.
Ku iya, ripot nya ukai dikena ngukum tauka bechiping ngagai sapa-sapa individu, tang lebih agi dikena meri ruang ngagai Polis Diraja Malaysia (PDRM) bejalaika pansik bebas, terang sereta profesyenal bepelasarka fakta enggau bukti.
“Kitai ngarapka polis ulih nentuka sekalika isi ke dikerembaika nya tulin, bisi petenah tauka ngundan elemen ngelanggar undang-undang.
“Enti bisi sebarang penyalah, atur ke patut meseti diambi nitihka penetap undang-undang ke dikena,” ku iya.
Nitihku Susan, Sarawak udah lama dikelala nyadi sebuah nengeri ti ngetanka nilai penyerakup enggau pengelantang entara komuniti pupu bansa, budaya enggau jalai pengarap.
Nya alai, sebarang penerang tauka tulis ba media rama ti bisi potensial ngasuh salah penemu, begedi tauka bepechah enda tau diambi mudah.
Iya mega ngelalau mensia mayuh ngambika seruran meresa pengamat penerang sebedau bekunsi ba media rama sereta ngemeranka etika ngena pelasar digital enggau betanggungjawap.
“Berebak enggau nya, aku bebasaka hak semua piak ngagai proses pansik ke lurus,” ku iya.
Susan mega minta semua rayat Sarawak terus ngemeranka semengat beserakup, bebasaka pangan diri sereta sama-sama nulak sebarang pengawa tauka provokasyen ti tau ngeruga pemaik, penegap enggau pengelantang nengeri tu.
Sama bisi nyempulang iya ngaga ripot polis iya nya Sekretari Politik Premier Sarawak, Kho Teck Wan enggau Kua Jack Seng. – RBI
#ruaiberitaiban#newsiban#beritaiban
Rindu | Titih | Kunsika
