MIRI, 4 Julai – Penusah angus ti ngaul paip gis ba Jalai Kwang Tung ditu udah mujur dirara raban bomba pagi tadi.
Balai Bomba enggau Penyah Penusah (BBP) Miri Sentral nerima kangau ngenyit urung pukul 9.58 pagi sebedau raban ari Tim Charlie ngesah ngagai palan penusah nyadi.
Raban bomba datai ba palan nya urung pukul 10.01 pagi lalu ngentaska bisi penusah angus ba paip gis baka ti diripot.
Komander operasyen udah nya ngasuh raban madamka api ngena arus hos bantu ari injin bomba nyentukka api abis padam.
Api mujur dirara urung pukul 10.10 pagi, seraya operasyen tembu abis urung pukul 10.52 pagi pengudah gaya dientaska likun.
Operasyen nya mungkur enam iku kaban BBP Miri Sentral ngena injin Tender Penyelamat Bomba (FRT), kelimpah ari dibantu dua iku raban Sarawak Gas.
Pengudah gaya ba palan nya ulih dijaga, pengawa ke bukai diserah ngagai Sarawak Gas.
Nadai penusah bakal tauka bebadi nyawa diripotka nyadi ba penusah nya. – RBI
#ruaiberitaiban#newsiban#beritaiban
Rindu | Titih | Kunsika
