GEDONG, 30 Jun — Perintah Sarawak terus ngenegapka agenda pemansang menua pesisir nengah pengawa bejalaika projek infrastruktur strategik ti deka ngemanahka agi penyambung sereta nyungkak penumbuh ekonomi ba kandang menua Gedong enggau Simunjan.
Bejaku ba Pengerami Nyambut Hari Gawai Pelilih Menua Gedong 2026 di Kampung Keniong Jaya kemari, Premier Sarawak, Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg madah, mayuh macham projek jalai alun benung sereta deka dipejalaika, nyengkaum jalai alun ke nyambung ngagai kandang menua Hulu Simunjan, Gedong, Sebuyau enggau kandang ngelingi dikena ngemandakka timpuh pejalai sereta ngerembaika akses ungkup rayat.
Nitih ku iya, pengawa ngaga rentayan jalai alun baru ti nyambung Samarahan, Gedong, Simunjan ngagai Sri Aman deka nempa koridor pemansang baru ti deka ngenyampatka mobiliti peranak sereta meransang aktiviti ekonomi di bagi menua Selatan enggau tengah Sarawak.
Ku iya, perintah Sarawak mega ngemeratka pengawa nyendiaka perengka guna pemun nyengkaum bekal ai beresi enggau kuasa karan ti deka terus dikemanah berenggat nyentuk ke taun 2030 dikena nentuka pengelantang pendiau rayat dijaga.
Pemujur Sarawak nyungkak penatai pemisi nengeri ngemendarka perintah ngadaka penguntung nya pulai ngagai rayat nengah pengawa bejalaika projek pemansang ti meri empas terus ngagai pengidup komuniti, ku iya nambah.
Berebak enggau nya, iya nyemetak madahka pemansang Gedong enggau Simunjan patut dipeda nyadi ekosistem ti sama begunaka laban kededua kandang menua nya ngembuan potensial mansang nyadi hab penumbuh baru lebuh rentayan jalai alun tembu penuh.
Chara pemansang ti diperambu enggau komprehensif dikearapka ulih muka mayuh agi peluang beranakka puku, nambahka rega ekonomi kandang menua sereta ngenegapka kaul entara menua pesisir enggau palan penumbuh besai nengeri tu.
Berindik enggau nya, iya minta rayat terus begempung sereta nyukung agenda pemansang perintah dikena nentuka semua perambu ulih nyadi nyata, lalu ari nya ulih mai penyulut ke meruan ngagai Sarawak.
Pengawa bejalaika projek infrastruktur besepadu dikearapka ulih nyadi penyungkak ngagai transformasyen sosio-ekonomi di Gedong enggau Simunjan, lalu enggau nya ulih ngenegapka agi pengawa Perintah Sarawak dalam ngerapitka seraka pemansang entara menua pesisir enggau mengeri ungkup pengelantang rayat enggau penyulut selampur nengeri tu. — RBI
#Beritalban | Ruai Berita Iban
Rinduka | Titihka | Kunsika
