MIRI, 26 Jun — Perintah Besai deka dipinta ngungkupka agih belanja dikena bejalaika kereja ngemanahka Jalai Padang Bilun Miri ti nyambung kandang menua Taman Delight enggau jalai pemintas padang bilun ngagai Jalai Off Bakam berindik ari pengerusak jalai enggau tanah tusur ti majak ngirauka ati.
Pekara nya dipadahka nengah penerang media begulai Kaban Parlimen P.218 Sibuti, Dato Lukanisman Awang Sauni, enggau Kaban Parlimen P.219 Miri, Chiew Choon Man, ti madahka isu nya begunaka atur lengkas laban ngaul pengelikun penguna jalai alun enggau peranak menua nya.
Nitihku sida, pengerusak ke nyadi ukai semina ngaul atas jalai aja, tang mega ngeruga struktur parit, sistem parit baruh tanah, penegap tinting enggau tanah tusur ti bisi potensial ngeruga pengelikun enti enda diputarka enggau lengkas.
Bepelasarka perati teknikal Opis Kereja Raya (JKR), kereja ngemanah nya dipelaba mungkur pengawa ngaga sereta ngemanahka parit, nyaga tinting, kereja tanah, melakin jalai enggau bejalaika atur pengelikun ke bekaul.
Taja pia, pengawa bejalaika projek nya betapi enggau penanggul ketegal status tanah ba kandang endur ti kena bungkur ari baruh Pesuruhjaya Tanah Perintah Besai bekaul enggau kandang endur Padang Bilun Miri, kelimpah ari proses nyerahka jalai nya ngagai Opis Perintah Lokal (PBT) tauka Perintah Nengeri ti bedau dipejuraika.
Taja pan napi pemar tu, kedua-dua Kaban Parlimen nya madahka semua ejensi Perintah Besai enggau Nengeri ti bekaul udah mantaika komitmen enggau pengeran sida bekerejasama nentuka pengawa ngemanahka jalai nya ulih dipejalaika kenyau ari jalai nya mayuh ditengah mensia mayuh.
Asil ari randau enggau Unit Penyelarasan Pelaksanaan, Opis Perdana Menteri (ICU JPM) Zon Miri, sida deka nganjung peminta agih belanja ngagai Perintah Besai dikena bejalaika chara mutarka timpuh panjai lalu ukai semina kereja ngemanah sementara aja.
Projek nya deka dipejalaika JKR Bagi Menua Miri nengah chara berenggat. Renggat keterubah mungkur pengawa mindah sementara tauka nyaga perengka guna ke udah bisi nyengkaum tali karan, infrastruktur telekomunikasyen enggau paip ai ti mungkur Sarawak Energy Berhad (SEB), Telekom Malaysia (TM) enggau Sarawak Water.
Sida mega madahka ungkus mindahka utiliti deka ditetapka nengah sebut rega ari kompeni utiliti ke bekaul, kelimpah ari minta runding ungkup ungkus nya dikurangka tauka dilepaska ungkup pemaik pengelikun mensia mayuh.
Renggat kedua deka ngemeratka kereja ngemanah fizikal nyengkaum ngaga baru parit, nyaga tinting, ngemanahka sistem parit enggau ngemanahka jalai alun, enggau pengawa matau terus enggau ICU JPM, JKR, Kaunsil Mengeri Miri, Pesuruhjaya Tanah Perintah Besai, Padang Bilun Malaysia enggau semua penyendia perengka guna ke bekaul.
Berebak enggau nya, kedua-dua Kaban Parlimen nya mega minta mensia mayuh besabar sepemanjai proses bejalaika projek laban beberapa prosedur teknikal, utiliti enggau status tanah patut ditembuka dulu dikena nentuka pengawa nya ulih dipejalaika enggau likun sereta teratur.
Sida mega deka terus mansik proses nyerahka jalai nya ari Pesuruhjaya Tanah Perintah Besai ngagai Perintah Nengeri tauka PBT dikena nentuka tanggungpengawa ngintu jemah ila terang agi sereta ulih dipejalaika enggau efisyen agi.
Dato Lukanisman enggau Chiew nyemetak madahka Jalai Padang Bilun Miri nyadi jalai strategik ti nyambung Padang Bilun Miri ngagai tengah mengeri sereta mega sitak Parlimen Miri enggau Sibuti, nya alai pengawa ngemanahka komprehensif deka terus dipejalai dikena nentuka pengelikun, ngelancharka trafik enggau pengelantang rayat.
“Kitai deka terus bejalaika pengawa ba selampur sitak parlimen enggau semua ejensi ke bekaul dikena nentuka kereja ngemanah ulih dipejalaika enggau naka pengelengkas lalu chara mutarka timpuh panjai ulih nyadi nyata ungkup pengelikun penguna jalai alun,” ku seduai iya. -RBI
#ruaiberitaiban#newsiban#beritaiban
Rindu | Titih | Kunsika
