KUALA LUMPUR, 25 Jun — Kaban Parlimen (MP) Sri Aman, Dato Sri Doris Sophia Brodie sehari tu mantaika sekeda pekara beguna bekaul enggau Rang Undang-Undang (RUU) Ubah Akta Jil 2026, nyengkaum pemar rumah jil kelalu sekut enggau pengawa bejalaika Perengka Pematau Elektronik dalam sistem ke adil jenayah menua tu.
Dalam pejurai ba Dewan Rakyat, iya madahka ubah nya ngayanka pengawa perintah ngenegapka sistem penyuman orang jil nengah chara ke moden agi, nyengkaum ngena teknologi matau elektronik enggau ngaul raban volunteer dalam program mulaika pemanah ulah.
Taja pia, iya nyemetak madahka isu tu patut diperatika dalam konteks ke lebih komprehensif, kelebih agi bekaul enggau gaya institusyen rumah jil menua tu ke diatu ti napi penanggul kelalu balat sekut.
Iya madah, bepelasarka ripot ke diatu naka bulan November 2025, penyampau orang jil di Malaysia udah ngelui 84,000 iku enti dibandingka enggau kapasiti rasmi urung 76,000 iku.
“Gaya tu mandangka sistem rumah jil beoperasyen ngelui ari kapasiti ke udah ditetapka, enggau urung satu pertiga ari orang jil nya mungkur orang jil riman ke bedau dipechara ba kot,” ku iya.
Nitih ku iya, gaya tu udah meri tekan ke besai ngagai sistem pentadbiran rumah jil, nyengkaum aspek pengelikun, pengerai enggau pengelantang orang jil, kelimpah ari ngeruga pemanah program penyuman ke nyadi batang sistem rumah jil moden.
Berindik enggau nya, iya mantaika sukung ngagai pengawa bejalaika Perengka Pematau Elektronik nyadi siti ari mekanisme dikena ngurangka penyekut rumah jil, nengah chara ngemendarka orang jil ke bisi risiko mit dikemata dalam komuniti enggau enda ibuh diengkah ba institusyen rumah jil.
Dato Sri Doris mega nerangka chara baka nya udah dipejalaika ba sekeda menua maju nyengkaum United Kingdom, Australia enggau Norway nyadi sebagi ari reformasyen sistem keadilan jenayah enggau pengawa ngurangka penyekut rumah jil.
Taja pia, iya nyemetak madahka pengawa bejalaika sistem nya meseti dipejalaika enggau komprehensif sereta bejimat nengah chara beratika aspek pengelikun, privasi, kos, akauntabiliti enggau pemanah pengawa bejalaika iya.
Dalam jurai ke sama, iya mantaika sekeda tanya ngagai Opis Menteri nyengkaum sekalika pengawa bejalaika perengka nya udah nengah pengawa beratika enggau komprehensif ari sukut pengelikun enggau efektiviti.
Iya mega minta penerang bekaul enggau mekanisme pengawa nyema perengka nya rusak, rajai, lenyau tauka bisi penanggul, nyengkaum timpuh timbal piak bekuasa dalam nyidi pengawa ngelanggar sereta ngambi atur ke patut.
“Aspek nyaga data diri mega bisi dibantaika kelebih agi jamin data endur enggau pemindah individu deka disimpan enggau likun, enda disalahguna, lalu semina ulih dilawa piak ke diberi kuasa,” ku iya.
Kelimpah ari nya, iya mega minta penerang bekaul enggau piak ti megai tanggungpengawa nyimpan sereta nyaga data, timpuh nyimpan data, enggau pengawa bejalaika audit pengelikun siber ari setiap maya.
Iya mega betanya sekalika pengawa bejalaika sistem tu deka dikerembaika ngagai Sabah enggau Sarawak, beratika pemar geografi enggau kandang menua ti besai ba kededua pelilih menua nya.
Ari sukut belanja, iya minta perintah meri anggar kesemua ungkus bejalaika sistem nya nyengkaum ungkus ngulihka perengka, ngintu, ngemansangka sistem matau, ngelatih pemesai, enggau ngatur data.
Iya mega meri langgur penemu ngambika perintah ngaga analisis kos-penguntung dikena nentuka chara tu lebih efektif sereta ekonomi ari chara tradisional baka ngaga rumah jil baru.
Ngemeratka sukut undang-undang, iya mega mantaika pengirau ati bekaul enggau Seksyen 63A dalam RUU nya, ti ku iya ulih nempa peragam ti madahka pengawa ti diambi ba sekeda atur nyangka enda kena atur undang-undang.
Nitih ku iya, gaya nya bisi potensial nempa isu akauntabiliti dalam pengawa ngatur mensia mayuh enti enda dipejuraika enggau manah.
Berindik enggau nya, iya merambu ngambika RUU nya dianjung baru ngagai komiti ke bekaul ngambika diperesa enggau silik agi.
Iya mega meri perambu sekeda pengawa ngemanahka polisi nyengkaum pengawa mantaika ripot ninting taun ngagai Parlimen bekaul enggau tikas penyekut rumah jil enggau pemanah perengka matau elektronik, netapka garis lalau nyaga data ke terang, menilai pemanah sistem nya ari setiap, sereta ngenegapka program penyuman enggau pematih pengelandik ungkup orang jil.
Lebuh nyimpul pejurai nya, iya nyemetak madahka pemujur sistem rumah jil enda patut disukat semina bepelasarka penyampau individu ke dijil, tang nitihka takah sistem nya udah mujur ngemanahka baru orang jil sereta ngurangka tikas penyalah ti berulang. — RBI
#Beritalban | Ruai Berita Iban
Rinduka | Titihka | Kunsika
