PETRA JAYA, 15 Jun — Pengawa Bejalai Niti Daun disadang nyadi sebengkah ari batang pengerami ke deka enchuri perati beserimbai enggau Pengerami Gawai Dayak Renggat Nengeri Sarawak 2026 ke alai sepenyampau 99 kontinjen udah dientaska nyereta pengawa nya ke deka diatur di Kuching Waterfront kena Hari Enam tu ila.
Sapit Premier Sarawak, Datuk Amar Douglas Uggah Embas madah, pengawa nyendiaka diri ngintu pengerami berambaika leka jaku “Segulai Sejalai” diatu nyau deka tembu berindik ari Aum Komiti Besai Pengerami Gawai Dayak Renggat Nengeri Sarawak ke diatur ba Bilik Aum Komiti 1, Renggat 3, Dewan Undangan Nengeri (DUN) Sarawak seharitu.
Nitih ku iya, pengerami ninting taun nya deka terus nyadi pelasar ke beguna dikena mantaika penyelai budaya, adat enggau identiti komuniti Dayak di Sarawak, kelimpah ari ngelakuka pesaka main asal nengeri tu ngagai komuniti lokal enggau temuai.
“Pengawa Bejalai Niti Daun deka diatur di Kuching Waterfront lalu dipelaba deka matak lebih 3,000 iku temuai datai.
“Sepenyampau 99 kontinjen udah ngenukuka penyereta lalu sekeda kontinjen antarabansa mega dipelaba deka ngambi bagi,” ku iya ba aum pengarang berita pengudah aum nya.
Ku iya, pengawa ngatur pengerami Gawai Dayak taun tu diatur komuniti Iban nitihka sistem besilih ti ngaul tiga batang komuniti Dayak iya nya bansa Iban, Bidayuh enggau Orang Ulu.
Ku iya, pekara ti pemadu dikerinduka pengerami nya deka diatur kena 21 Jun nengah Pengerami Makai Lemai Gawai Dayak Renggat Nengeri Sarawak di Palan Konvensyen Borneo Kuching ti dikearapka ulih ngempuru mayuh macham ketuai, orang ti dipebasa sereta pengari komuniti Dayak ari serata Sarawak.
Nitih ku iya, Tuai Pemegai Menua (TYT) Negeri Sarawak, Tun Pehin Sri Wan Junaidi Tuanku Jaafar, diperambu deka nyadi temuai dipebasa ba pengerami nya, seraya Menteri Besai, Dato’ Seri Anwar Ibrahim enggau Premier Sarawak, Datuk Patinggi Tan Sri Abang Abdul Rahman Zohari Abang Openg mega disadang datai.
Ku iya nambah, entara pengerami makai lemai nya iya nya pengawa mandangka teater khas Yayasan Kebudayaan Dayak ti berambaika leka jaku Ari Ruai ngagai Panggau Dunia ti ngayanka pejalai enggau penyulut komuniti Dayak ari pengidup asal nyentuk ke chakah ngaul diri dalam pemansang moden.
Kelimpah ari nya, pengerami nya mega dirichah enggau pemerindang ari artis menua tu baka Rickie Andrewson, Phoebe Chloe Tay enggau Rozzie Mila, kelimpah ari pemerindang khas ari penau biak Little Birdie ke udah nempa Sarawak tebilang ba panggau main asal antarabansa.
Ba pemansang ke bekaul, Uggah madahka program Gawai Bazaar enggau Festival Budaya Etnik ke nyadi di Miri kena 1 ngagai 23 Mei tu tadi udah mujur nyapai juluk dalam ngelakuka budaya enggau pesaka asal komuniti Dayak ngagai mensia mayuh.
Iya mega meri besai terima kasih ngagai Perintah Sarawak, Perintah Besai, piak ti melanja sereta mayuh bengkah ejensi ti bisi kaul enggau sukung sereta kerejasama ti diberi nentuka Pengerami Gawai Dayak Renggat Nengeri Sarawak 2026 ulih dipejalaika enggau mujur.
Pengerami ke berambaika leka jaku “Segulai Sejalai” nya dikearapka nyadi pelasar beguna dalam pengawa ngenegapka penyerakup, ngetanka pesaka asal enggau ngelakuka mayuh macham main asal komuniti Dayak ngagai komuniti ke besai agi, setipak enggau aspirasyen Sarawak ke nyadi sebuah nengeri ke kaya enggau penyelai budaya sereta pesaka asal ke nyelai. – RBI
#ruaiberitaiban#newsiban#beritaiban
Rindu | Titih | Kunsika
