MIRI, 14 Jun — Direktor Betanam Betupi Sarawak, Dominic Anak Chunggat minta semua pengereja pengawa Opis Betanam Betupi Sarawak terus ngenegapka semengat kerejasama, nerenakka budaya bebasaka pangan diri sereta ngetanka pengelantang ba endur gawa dikena nentuka pengawa meri servis ngagai rayat enggau pemansang sektor betanam betupi nengeri maju enggau meruan.
Pesan nya dikenataika iya lebuh bejadika Pengerami Mandat Direktor Betanam Betupi Sarawak ke diatur ba Palan Ilham, Permyjaya, Miri, ti diatur Opis Betanam Betupi Bagi Menua Miri enggau kerejasama Pertubuhan Peladang Kandang Menua (PPK) kena Hari Lima tu tadi.
Pengerami nya mega digulu bala pengereja pengawa Opis Betanam Betupi Bagi Menua Miri, Marudi, Bakong, Bekenu enggau Batu Niah, sereta mega pengari Pertubuhan Peladang Kandang Menua (PPK).
Dalam pesan iya, Encik Dominic nyemetak madahka kereja beraban enggau kerejasama ti tegap nyadi elemen ti beguna dalam nentuka pengawa ulih dipejalaika enggau manah sereta nyapai juluk ti udah ditetapka piak nya.
Ku iya, tetiap pengereja pengawa meseti terus ngemeranka semengat solidariti sereta nyukung pangan diri napi pemar pengawa ti majak kompleks, kelebih agi berindik ari pengawa bejalaika bemacham polisi enggau garis lalau baru.
Kelimpah ari nya, iya mega ngemeratka pemesai guna pengawa timbang pengidup enggau pengawa ngatur kereja enggau efektif dikena nambahka produktiviti sereta nempa rampa kereja ti lebih positif, bepengerai sereta likun.
Kenu ku iya, ulah bebatak asur, bebasaka pangan diri sereta bekerejasama meseti terus dikemeranka dikena ngetanka pengelantang dalam organisasyen.
Berebak enggau nya, iya ngingatka media rama enda patut nyadi medium mantaika asai enda puas ati ti tau ngeruga imej enggau nama opis.
Ngenang pasal sukut nyadi ketuai enggau pentadbiran, Dominic ngemeratka prinsip ti adil meseti dikemeranka enggau konsisten nengah chara nentuka genap iku pengereja pengawa diberi servis enggau lurus sereta enda ngira penatai, kelimpah ari nulak sebarang bansa diskriminasyen enggau rasis ba endur gawa.
Ku iya, chara pentadbiran ti terang, lurus sereta inklusif meseti dikena dalam tetiap sukut ngatur pengawa dikena nentuka pengelantang enggau pemerat semua pengereja pengawa seruran dijaga.
Nyimpul pesan iya, iya ngarapka semua pengereja pengawa Opis Betanam Betupi Sarawak terus ngenegapka semengat begulai, nyaga pengelantang organisasyen sereta sama-sama nyaga pemanah nama opis dikena nentuka pengawa ngenataika servis ti bekualiti ngagai rayat sereta pemansang sektor betanam betupi Sarawak ti meruan.
Sama bisi datai iya nya Kepala Penulung Direktor Bagian Perambu, Benedict Teo; Pemesai Betanam Betupi Bagi Menua Miri, Puan Chong Mui Sia; enggau Menijar Besai merangkap Penulung Kanan Pemesai Betanam Betupi, Puan Norlida binti Rawi. — RBI
#Beritalban | Ruai Berita Iban
Rinduka | Titihka | Kunsika
