KUCHING, 12 Jun — Orang indu di Bukit Saban diperansang terus ngangkatka pengelandik diri sereta beambi ulih ari mayuh macham program pemansang kapasiti enggau pengawa dagang dikena mantu ngulihka penatai pemisi sereta ngenegapka ekonomi ruang bilik.
Sapit Premier Sarawak Datuk Amar Douglas Uggah Embas ke mega Kaban Kunsil Nengeri (ADUN) sitak N.37 Bukit Saban madah, pengawa ngenegapka orang indu deka terus nyadi entara batang agenda perintah berindik ari pemesai guna raban tu dalam pemansang ruang bilik enggau komuniti.
Nitihku iya, pengawa ti enda ngetu deka dipejalaika begulai enggau Kaban Parlimen Betong, Dato Dr Richard Rapu, dikena nentuka mayuh agi program pemansang enggau ngangkatka pengelandik ulih diberi kelala ungkup pemaik orang indu ba kandang menua Betong.
“Kitai dekaka orang indu ngembuan pengelandik ke ulih disalin ngagai peluang ekonomi sereta nyadi pun penatai pemisi ke meruan ungkup ruang bilik sida,” ku iya lebuh bejaku ba Program Ngangkatka Pengelandik Manduk Orang Indu N.37 Bukit Saban ke diatur Indu PBB Pampang Bukit Saban ke diatur ditu sehari tu tadi.
Ku iya, pesereta patut ngena penuh penemu enggau peneleba ke diulih sepemanjai program tu lalu bekunsika penemu nya enggau komuniti ba kandang menua sida empu ngambika pemaik iya ulih dikerembaika ngagai mayuh agi orang indu.
Program pengelama tiga hari nya meri eksposur teori enggau praktikal ngagai pesereta dalam mayuh bengkah sukut nyendiaka pemakai, nyengkaum latih ngaga enggau nggoreng mi kuning, nyendiaka mayuh macham menu kulinari enggau kus mantaika pemakai.
Datuk Amar Douglas Uggah mega madah, sekeda program nangkan nya udah diperambu dikena ngerembaika peluang ekonomi ngagai orang indu menua pesisir, nyengkaum latih ngaga manik enggau dabung, seni beranyam enggau betanam betupi moden nengah chara fertigasyen.
Nitih ku iya, inisiatif tu sebagi ari pengawa perintah ti seruran dipejalaika kena ngenegapka orang indu nengah bemacham program pemansang kapasiti enggau pengawa dagang, lalu enggau nya ulih mantu nyungkak penatai pemisi ruang bilik enggau pengelantang ruang bilik ba kandang menua Bukit Saban.
Sama bisi ngulu program nya Datin Amar Dato Doreen Mayang enggau Ketuai Indu PBB Pampang Bukit Saban, Natasha Nasa Uggah. — RBI
#Beritalban | Ruai Berita Iban
Rinduka | Titihka | Kunsika
