MULU, 12 Jun — Penemuai matau dipejalaika di Kuala Tutoh, Mulu dikena beratika tikas bejalaika Projek Rainwater Harvesting Tank (RWHT) ti nyadi sebagi ari batang inisiatif bekal ai menua pesisir ba kandang menua Agensi Pemansang Tanah Tinggi (HDA).
Projek tu ngembuan tuju deka nambahka akses ngagai bekal ai beresi sereta likun ungkup komuniti menua pesisir.
Komponen projek di Kuala Tutoh mungkur pengawa masang 76 unit tangki ai enggau kapasiti 2,700 liter tetiap unit.
Projek nya tembu dulu ari timpuh asal ke udah ditetapka kena 21 Jun 2026, lalu diatu udah befungsyen penuh dalam mekal pengeraja asal ai ngagai peranak kandang menua nya.
Tetiap unit rumah (bilik) udah diungkupka tangki dikena nentuka pengawa ngagih ti lebih sistematik sereta efektif.
Nitihka penerang ari RECODA, skop kereja ke agi tinggal ari baruh inisiatif bekal ai tu deka diteruska enggau pengawa masang sistem ngambi ai sungai enggau sistem meresi ai ungkup kandang menua Rumah Rok, Lajang, Anthony, Asong, Long Terawan enggau Long Ukok.
Semua projek nya diperambu tembu penuh dalam bulan Disember 2026 lalu nyadi sebagi ari pengawa ti seruran dipejalaika Lembaga Pembangunan Koridor Wilayah RECODA dalam ngemanahka akses ngagai bekal ai beresi di kandang menua pesisir, seriris enggau aspirasyen Strategi Pemansang Pasca COVID-19 ti ulih meretika mayuh agi Sarawak.
Penemuai nya digulu Direktor Wilayah HDA, Encik Juan Ubit; Menijar Pengatur Pengawa Ngaga HDA, Encik Cecil Riseng; pengari Opis Pelilih Marudi, Puan Vanessa Joseph; Ketuai Genturung Pendiau Kuala Tutoh, Bapak Moses; enggau pengari komuniti setempat. — RBI
#Beritalban | Ruai Berita Iban
Rinduka | Titihka | Kunsika
