SARIKEI, 9 Jun – Urung 160 iku raban nembiak enggau temuai ke dikangau ari serata Sarawak begempuru ngintu Hari Nembiak Sarikei 2026 (SYD2026), sebengkah gempuru ti nyerakupka rebak baru pengarap Katolik dalam semengat pengarap, begulai enggau pengelantang.
Ngambi rambai jaku “Bersinar Dalam Harapan”, program empat hari nya ukai semina pengawa ninting taun aja, tang nyadi bidang penumbuh semengat ti ngerapitka kaul raban nembiak enggau Kristus nengah sampi, komuniti enggau misyen.
SYD2026 mega nyadi pelasar nyendiaka diri ungkup Hari Nembiak Katolik Malaysia (MCYD), enggau mayuh isi penumbuh enggau randau rohani dikemeratka setipak enggau agenda pemansang nembiak Gerija ba renggat nasional.
Program tu bepalan ba empat pugu pekara pastoral Gerija iya nya Ekologi, Gerija, Ruang Bilik enggau Komuniti Mensia (KORASIA).
Empat elemen tu nyadika pelasar refleksyen, randau enggau peneleba sampi ti meransang raban nembiak nyadi orang ti nyaga rampa menua, kaban Gerija ti regas, saksi pengarap dalam ruang bilik sereta orang ti ngaga komuniti ti bisi penyinu.
Kelimpah ari isi rohani, bemacham aktiviti lumba enggau main sereta Festival Belia mega bisi diatur dikena ngerapitka kaul entara penyereta.
Tu nyengkaum pekit main bol tampar, tarit tali, main asal, catur, e-lumba kelimpah ari aktiviti kreatif baka ngaga Rosario enggau sesi sembiang Taizé.
Pengawa bejadika pengerami nya diintu enggau Ukaristia ti betuaika Bishop Joseph Hii, Bishop Diocese Sibu, ti mantaika sukung penuh ngagai pengawa ngenegapka raban nembiak dalam pengidup Gerija.
Entara pekara ti pemadu negu ati iya nya bekunsi rohani ari Fr. Sylvester Ngau Juk ti ngemeratka kangau ngagai kemisi nengah rambai jaku “Penampak, Regang, Ngerembaika”, ngingatka bala penyereta ngambika terus nyadi ngemai penampak Kristus, ngesan regang sereta madahka Berita Manah enggau nadai penanggi.
Sepemanjai program nya, penyereta mega bisi ngulu sesi puji enggau sembiang ti dipejalaika Focus On Christ (FOC), sesi ngenegapka pengarap raban nembiak enggau sembiang Taizé ti betuaika raban nembiak ari Archdiocese Kuching.
Penteba pengarap mega bisi dikunsi Anna Teresa ari Diocese Sandakan enggau Lucy Gumek ari Archdiocese Kuching ti mega alumni IFFA.
Sida meransang bala penyereta ngambika mengkang tegap dalam pengarap sida, nyadi nembiak Kristus ti tetap ati sereta ngidupka nilai Kristian dalam pengidup sida ninting hari.
Gempuru nya ngempuruka raban nembiak ari mayuh bengkah parish nyengkaum St.Anthony Sarikei, Christ the King Bintangor, St.Mary Sibu, St.Michael Sibu Jaya, Immaculate Conception Kapit, Katedral Sacred Heart, St.Bernard Dalat enggau St. Peter sereta Paul Mukah, kelimpah ari penyereta ari “Keuskupan” Miri enggau beberapa keuskupan lain ba rantau tu.
SYD2026 mega mantaika semengat meri servis ngagai komuniti lebuh Gerempung Indu Katolik St.Anthony ti betuaika Madam Monica Normie nyendiaka pemakai sepemanjai program enggau penuh dedikasyen dalam nyaga pengelantang penyereta.
Pengawa ngatur program nya mega nerima sukung ari mayuh bengkah piak nyengkaum Rimbunan Sawit Berhad, komuniti parish kelimpah ari bantu teknikal ari Tim MCP Beesamah.
Pemujur SYD2026 mega asil ari komitmen Tim Pengatur Besai (MOT), Tim Pengatur Kandang Menua (LOT), raban nembiak enggau alumni ti besaup ngemujurka gempuru nya.
Lebih ari semina program aja, SYD2026 nyadi palan betemu ti beguna ti ngenegapka penyerakup raban nembiak Katolik di Diocese Sibu enggau Sarawak ba selampur.
Asil ari randau enggau penemu bala penyereta deka dibai nyadika program nembiak ngagai Konvensyen Pastoral Malaysia ti deka datai di Sibu.
Setipak enggau semengat, SYD2026 ngayanka lebuh raban nembiak begempuru dalam Kristus, pengadang ukai semina idup, tang mega manchar terang agi ungkup jemah ila Gerija enggau mensia mayuh. – RBI
#ruaiberitaiban#newsiban#beritaiban
Rindu | Titih | Kunsika
