DEBAK, 4 Jun — Raban Penyaga Orang Periman Malaysia (APM) Pelilih Menua Debak mujur nangkap siku ular sawa ti dipelabaka pemanjai urung 15 kaki dalam operasyen di Kampung Debak Laut, ditu sehari tu tadi.
APM Debak madahka bisi nerima sebana ari peranak rumah bekaul enggau penatai ular nya ti dipelabaka besemak enggau genturung pendiau sereta meri pengirau ati ngagai pengelikun mensia mayuh.
Tekala nya pengudah nerima ripot nya, seraban APM udah ngesah ngagai endur penusah nyadi ngambika bejalaika operasyen nangkap ular sawa nya.
Lebuh datai ba endur nya, raban APM tetemuka siku ular sawa besai ba kandang endur nya.
Operasyen nangkap ular nya dipejalaika ngena perengka khas enggau chara ti likun dikena nentuka pengelikun semua piak.
Bala kaban ke bejalaika pengawa mujur nagang sereta nangkap ular sawa nya enggau nadai sebarang penusah ke enda manah nyadi.
Ular sawa nya udah nya dibai pansut ari genturung pendiau ngambika atur dipejalaika enggau silik agi nitihka atur ke udah ditetapka.
APM ngemeratka komitmen sida ti terus mantu komuniti napi sebarang bansa penusah ngenyit enggau pengelikun nyengkaum ngatur jelu siga ti meri risiko ngagai mensia mayuh. -RBI
