MANCHESTER, 22 Mei – Manchester United madahka Michael Carrick deka mengkang nyadi kepala jurulatih tim lelaki sepengudah nyain kontrak baru nyentuk taun 2028.
Carrick pulai baru ngagai United nyadi kepala jurulatih dalam bulan Januari lalu udah meri empas ke besai lebuh menang anugerah Menijar Ninting Bulan Liga Premier pengudah ngalahka Manchester City enggau Arsenal ba dua main keterubah iya.
Nengah pengawa ngatur iya, United bulih penuduk ba Liga Champions UEFA musin baru pengudah ngerikod 11 kali menang ari 16 main, lalu enggau nya ngumpul penyampau poin pemadu mayuh ba Liga Premier kenyau iya ngambi alih tim nya.
Siku ari pemain ke pemadu nyulut dalam sejarah kelab nya, Carrick kala bemain 464 kali ungkup United lalu menang lima gelar Liga Premier, Piala FA, dua Piala Liga, Liga Juara UEFA, Liga Europa UEFA enggau Piala Dunya Kelab FIFA.
Carrick madahka diri seruran ngasaika “penyelai Manchester United” kenyau ari datai ba kelab nya 20 taun ke udah.
“Ngambi tanggungpengawa ngiring kelab khas tu meri aku temegah ati ti enda ulih dikira.
“Dalam kandang lima bulan ke udah, raban pemain tu udah ngayanka sida bepenau ba tikas penegap runding, semangat tim enggau penetap ati ti diguna ditu.
“Diatu maya iya kami mansang ke mua begulai enggau juluk ati ke besai sereta tuju ke terang.Manchester United enggau penyukung kami ke enda ulih disagam patut pulai bepekit ngulihka trofi ke pemadu besai,” ku iya.
Berebak enggau nya, Direktor Main Bol United, Jason Wilcox, madahka Carrick tentu patut nerima peluang terus ngiring tim nya bepelasarka prestasi iya enggau ubah positif ke udah dibai iya.
Nitih ku iya, pemujur nguluka United pulai ngagai Liga Champions enda ulih diambi mudah lalu udah mujur nempa budaya menang ti majak tegap ba Carrington enggau ba bilik ganti tim nya. -RBI
#ruaiberitaiban#newsiban#beritaiban
Rindu | Titih | Kunsika
